Уринарни инфекции – сериозен аларм кој не смее да се игнорира

Уринарните инфекции се едни од најчестите инфекции кај женската популација, но ги погодуваат и мажите и децата. Секојдневно се сретнувам со пациенти кај кои на прв поглед „обична инфекција“ преминала во посериозна состојба – пиелонефритис или хронично оштетување на бубрезите.

Најчести симптоми се:
- печење при уринирање
- чести повици за мокрење
- болка во долниот дел на стомакот
- заматена урина, понекогаш со непријатен мирис
- температура (ако инфекцијата се проширила кон бубрезите)

Уринарните инфекции најчесто се предизвикани од бактерии – ешерихија коли е водечки причинител. Неправилната хигиена, задржувањето урина, тесната облека, намалениот имунитет и хормоналните промени (особено кај жените) го зголемуваат ризикот.

Зошто е важно рано лекување
Нелекувана инфекција може да доведе до воспаление на бубрезите, сепса, па дури и трајно оштетување на бубрежната функција. Кај хронични пациенти, дури и лесна инфекција може да го влоши здравјето.

Превенција
- внес на доволно течности
- редовно празнење на бешиката
- правилна интимна хигиена
- избегнување непотребни антибиотици (кои можат да ја нарушат микрофлората)

Најважно е да не се игнорираат симптомите. Со навремено дијагностицирање и соодветна терапија, уринарната инфекција може брзо да се санира без последици.
Здравјето на бубрезите започнува со грижа за најмалите симптоми. Не чекајте – консултирајте се со стручно лице!

Пишува
д-р Тања Величковска
Доктор по општа медицина