Сè за „Мовембер“

|



Дали вам ви се допаѓаат или не, мустаќите се актуелни секоја година, особено во месец ноември. Во последните неколку години секој ноември го слушаме зборот „Мовембер“ – или адаптирано на македонски јазик – моември. Но, зошто е тоа така и што, всушност, означува оваа глобална сензација во текот на овој период од годината?

Што е „Мовембер“?

Секоја година, во месец ноември, мажите низ целиот свет пуштаат бркови – што има многу подлабоко значење од само декорација на нивното лице. Со цел да се подигне свесноста за здравјето на мажите, во месец ноември, покрај годишните редовни прегледи, мажите се охрабруваат да бидат свесни за семејната историја на рак и да воведат здрав начин на живот. Ако забележите дека сè повеќе и повеќе мажи пуштаат мустаќи или брада, не помислувајте дека тоа е резултат на нивната мрзеливост или на нов тренд. „Мовембер“ е едномесечна кампања за собирање пари и свест за здравствени проблеми кај мажите, како што се рак на простата, карцином на тестиси и проблеми со менталното здравје, како што се депресија и анксиозност.

Идејата за „Мовембер“ е родена во 2003 година во Мелбурн, Австралија. Во првиот предизвик во „Мовембер“, група од 30 пријатели Ауси (самопрогласени „Мо Брос“) се предизвикуваа едни со други да ги растат мустаќите цел месец, едноставно да видат дали тие можат да го вратат стилот на популарност. Изненадени од способноста  нивните смели мустаќи да предизвикаат започнување разговор, основачите решија да го прикачат предизвикот на достојна, но занемарена причина – здравјето на мажите – по што се роди Фондацијата „Мовембер“.

„Мовембер“ сè уште има за цел да  поттикне разговор и да ја зголеми свеста за ракот на простата, но денес, проектот, исто така, е фокусиран и на ракот на тестисите и проблемите со менталното здравје. Стапката на карцином на тестисите е двојно зголемена во последните 50 години, додека, пак, за стапките на рак на простата се предвидува дека тоа ќе се случи  во следните 15 години. Околу овие здравствени проблеми сè уште владее тишина, која благодарение на „Мовембер“ се разбива.

Доколку и вие сакате да станете дел од „Мовембер“, едноставно пораснете ја брадата во текот на месец ноември, иницирајте што повеќе разговори за здравјето на мажите или донирајте пари во соодветната невладина организација.

„Мовембер“ е неверојатен начин да се разбие тишината околу машкото здравје на глобално ниво. За да започнеме и да го прославиме почетокот на „Мовембер“, еве неколку интересни факти за мустаќите.

• Во шпил карти, само кралот срце е без мустаќи.


• Мажите во текот на својот живот трошат приближно шест месеци во бричење или негување на својата брада.


• Во Еурека, Невада на мажите со мустаќи им е забрането да бакнуваат жена.


• Во индиската држава Мадија Прадеш веруваат дека полицајците кои имаат мустаќи се со поголем авторитет и токму затоа државата им плаќа бонуси.


• Првиот историски артефакт што прикажува мустаќи датира од 300 г. пр.н.е. – каде се гледа ирански коњаник со густи, црни мустаќи.


• Студија на Универзитетот во Јужен Квинсленд, Австралија покажа дека влакната на лицето можат да го намалат ризикот од рак на кожата со тоа што го кријат лицето од штетните УВ- зраци.


• На машкото лице има помеѓу 10 000 и 20 000 влакна, додека просечните мустаќи се составени од 600 влакна.


• Според Гинисовите рекорди, Рам Синг Чаухан го држи рекордот за најдолги мустаќи кои ги негува од 1982 година и се долги цели 14 метри.


• Мажот со мустаќи ги допира своите мустаќи во просек 760 пати во текот на еден ден.


• На американските маринци не им е дозволено да растат мустаќи подолги од 1,5 сантиметри.


• Експертите тврдат дека при извиткување на краевите на мустаќите се зголемува концентрацијата и когнитивната способност.

Правила кои треба да ги почитувате доколку сакате да бидете дел од оваа глобална акција:

1. На први ноември треба да бидете избричени и практично да почнете од нула со растење на мустаќите.


2. Одберете стил кој најдобро ќе ви прилега.


3. Мустаќите може да ги кратите повремено, но не смеете да ги отстраните до крај на месецот.


4. Не заборавајте дека менувате многу повеќе од само вашиот изглед. Приспособете  го вашето однесување, едуцирајте се и информирајте ги вашите најблиски за машкото здравје.

За детално читање на овој текст, погледнете на 30 стр. во електронското издание на BETTY магазин (НОЕМВРИ 2020).