Si të forcohet imuniteti te fëmijët?

|

Zorica Martinoska Andonovsa
doktoreshë mjekësisë
IPSH CITUS - SHTIP



Çfarë është imuniteti?

Imuniteti është rezistenca e trupit ndaj një sëmundjeje të caktuar, më saktësisht ndaj shkakut të asaj sëmundjeje. Njeriu vjen çdo ditë në kontakt me mikroorganizmat patogjene dhe jopatogjene, por falë imunitetit është i mbrojtur prej tyre. Faktorët trashëgues dhe mënyra e jetesës (në çfarë mjedisi jetojmë, nëse jemi ose jo të prirur ndaj stresit, ushqimi dhe lëngjet që konsumojmë) përcaktojnë në masë të madhe se sa i fortë do të jetë sistemi ynë imunitar. Çrregullimet e imunitetit janë baza e shumë sëmundjeve.

Imuniteti mund të jetë:

1. I lindur - i cili fitohet që në lindje


2. I fituar - i cili mund të jetë pasiv ose aktiv në përputhje me mënyrën që është marrë. Imuniteti aktiv ndahet në natyral, i cili merret si rezultat i kontraktimit të ndonjë sëmundjeje infektive (p.sh. fruthi) dhe artificial, i cili merret pas vaksinimit. Imuniteti pasiv ndahet gjithashtu në natyral, të cilin i porsalinduri e merr përmes qumështit të nënës nga nëna dhe artificial, i cili merret duke futur imunoglobulina në organizëm.

Cilat janë simptomat e imunitetit të dobësuar?

Simptomat më të zakonshme të imunitetit të dobësuar tek fëmijët:

• Lodhje - fëmija me imunitet të dobët nuk ka forcë të mjaftueshme për aktivitete të përditshme normale dhe shpesh ndihet i lodhur dhe i plogësht.


• Fëmija nuk ka peshë të mjaftueshme për moshën (rritja e dobët dhe nënpesha e fëmijës është një dritë e kuqe që paralajmëron imunitet të zvogëluar).


• Infeksione të shpeshta


• Reagimet alergjike

Është shumë e rëndësishme që prindërit të kenë njohuri të mjaftueshme për këto simptoma që tregojnë imunitet të zvogëluar tek fëmijët, për diagnostikimin në kohë dhe trajtimin e duhur.

Si të forcohet imuniteti te fëmijët?

Ka disa këshilla të provuara që çdo prind duhet t'i zbatojë për imunitet më të mirë të fëmijës. Së pari, fëmijët nuk duhet të ekspozohen ndaj situatave stresuese, por duhet të kënaqen dhe të luajnë. Përndryshe, në trupin e fëmijës, ashtu si tek të rriturit, sekretohen hormonet e stresit që dobësojnë sistemin imunitar.

Përveç kësaj, kemi edhe disa udhëzime shtesë për ju:

Vitaminat dhe mineralet

Vitamina D ka dy role shumë të rëndësishme: antiinflamator dhe imunorregullues. Prandaj është shumë e rëndësishme për funksionimin e sistemit imunitar, sepse me veprimin e vet mbron trupin nga infeksionet, duke nxitur qelizat e bardha të gjakut që të dalin në mbrojtje. Mungesa e vitaminës D mund të shoqërohet me një rrezik të shtuar të zhvillimit të infeksioneve të frymëmarrjes, prandaj është shumë e rëndësishme për funksionimin e duhur të sistemit imunitar dhe mbrojtjen nga sëmundjet.

Zinku është mineral që ka një funksion shumë të rëndësishëm imunitar. Si antioksidant i fuqishëm, zinku mbron qelizat dhe parandalon dëmtimin e tyre. Duke forcuar sistemin imunitar, zinku ndikon në punën e qelizave që luftojnë infeksionet. Përveç kësaj, ndikon në aktivizimin e enzimave që veprojnë kundër patogjenëve, duke zbërthyer kështu proteinat e tyre.

Vitamina C falë veprimit të saj antioksidues, si dhe shpërndarjes së gjerë në ushqime, është e mirënjohur për të gjithë ne. Ajo mbron trupin nga toksinat, duke parandaluar dëmtimin e qelizave dhe kështu parandalon shfaqjen e infeksioneve të frymëmarrjes. Vitamina C është e domosdoshme në periudhën kur imuniteti duhet të forcohet më tepër, sepse merr pjesë në procesin e prodhimit të qelizave të kuqe të gjakut (eritrocitet).

Vitaminat e grupit B Ky grup përbëhet nga tetë vitamina të ndërlidhura që gjenden natyrshëm në burimet bimore dhe shtazore. Për shkak se janë të tretshme në ujë, ato nuk mund të grumbullohen në trup, prandaj duhet të merren çdo ditë.
Burime të pasura të vitaminave B janë perimet me gjethe jeshile, patatet, drithërat integrale, bishtajoret, arrat, mëlçia dhe mishi i padhjamë.

Probiotikët janë kultura të baktereve acidofile që gjenden në traktin e zorrëve të njerëzve të shëndetshëm. Probiotikët luftojnë kulturat e dëmshme dhe parandalojnë transportin e patogjenëve në trup. Ata gjithashtu lejojnë që trakti gastrointestinal të rrisë marrjen e mineraleve, sepse marrja e zvogëluar e tyre dobëson imunitetin. Laktobakteret janë mbrojtja e vetme natyrore kundër kandidës dhe infeksioneve të tjera kërpudhore që dobësojnë shumë imunitetin. Kulturat aktive acidofile përshpejtojnë përjashtimin e produkteve toksike që krijohen gjatë tretjes dhe lejojnë shfrytëzimin e lëndëve ushqyese thelbësore nga ushqimi.

Këto baktere janë thelbësore për imunitet të mirë.
Probiotikët rekomandohen kur përdoren antibiotikët, për diarre dhe kapsllëk, dhimbje barku, alergji ushqimore, infeksione virale të zorrëve dhe kandidiazë.

Shprehitë personale

• Larja e shpeshtë e duarve


• Gjumi i mjaftueshëm


• Pirja e sasive të mjaftueshme të lëngjeve


• Ecja në ajër të pastër


• Një dietë e shumëllojshme, e pasur me vitamina dhe minerale


• Shmangia e dhënies së panevojshme të antibiotikëve

Për lexim të hollësishëm të këtij teksti, shihni f.6-7 të botimit elektronik të revistës BETTY (DHJETOR 2020).