Kontrolli i yndyrnave në organizëm me preparate natyrale

Blagoja Stavrov
Doktor i Mjekësisë së Përgjithshme në
IPSH Poliklinika e studentëve e
Universitetit “Shën Kirili dhe Metodi” në Shkup

|



Kolesteroli është një lipid që sintetizohet në mëlçi, por e marrim edhe me ushqim. Është përgjegjës për sigurimin e integritetit të murit qelizor, përkatësisht është pjesë përbërëse e membranave të të gjitha qelizave në inde dhe organe. Është i nevojshëm për sintezën e vitaminës D dhe është pjesë e hormoneve të rritjes, zhvillimit dhe riprodhimit, si dhe pjesë e acideve biliare që janë të nevojshme për tretjen e ushqimit.

Trigliceridet luajnë rol në sigurimin e energjisë nga ushqimi që hamë përmes kalorive në formën e karbohidrateve, yndyrnave dhe proteinave. Teprica e këtyre kalorive, të cilat trupi nuk do t'i përdorë, ruhen në formën e triglicerideve. Ato ruhen në qelizat dhjamore të trupit dhe përdoren më vonë, kur mungon ushqimi.

Për sa kohë që vlerat e këtyre fraksioneve janë normale, organizmi funksionon si duhet. Vlerat normale janë si më poshtë:

Kolesteroli total 5,2 mmol/l

Kolesteroli LDL <3,0 mmol/l

Kolesteroli HDL > 1,0 mmol/l

Trigliceridet <1,7 mmol/l

Kur në organizëm rritet kolesteroli “i keq” ose LDL, si dhe nivelet e triglicerideve, rritet edhe rreziku i sëmundjeve koronare, ndërkaq rritet edhe mundësia e rritjes së pllakave arteriale, të cilat mund të çojnë në aterosklerozë. Shkaqet mund të jenë të ndryshme dhe ndahen në të kontrolluara dhe të pakontrolluara. Në grupin e parë bëjnë pjesë dieta, pesha dhe aktiviteti fizik, kurse në të dytin gjenetika, gjinia dhe mosha. Lajmi i mirë në këtë analizë për pasojat e mundshme të rritjes së kolesterolit dhe triglicerideve apo dislipidemisë, është se mund të trajtohet me preparate që janë me bazë natyrale. Tashmë ka në dispozicion preparate të tilla natyrale, të cilat janë kombinim i orizit të kuq dhe angjinares dhe me të cilat ka një rezultat shumë pozitiv në mjekim.

1. Orizi i kuq është i pasur me përbërësit aktivë monakolinë, të cilët konsiderohen si statina natyrale. Nga të gjitha monakolinat, më aktive është monakolina K, e cila e inhibon enzimën HMG-CoA reduktazë dhe në këtë mënyrë ndalon sintezën e kolesterolit në mëlçi. Monakolina K njihet edhe si mevinolinë ose lovastatinë. Monakolina K është vendimtare për efektivitetin e orizit të kuq në uljen e kolesterolit total, uljes së kolesterolit LDL dhe triglicerideve në gjak. Përveç monakolinës, procesi i fermentimit prodhon sterole bimore, acide yndyrore të pangopura, enzime tretëse, vitaminën B (niacinën) dhe produkte të tjera që gjithashtu kontribuojnë në veprimin dhe efektivitetin e produktit. Efekti i dobishëm arrihet me marrjen ditore të 10 mg monakolinë K nga orizi i kuq i fermentuar. Falë studimeve të shumta që dokumentojnë efektet e mësipërme, ekziston një pretendim shëndetësor i miratuar që monakolina K e fermentuar e orizit të kuq ndihmon në ruajtjen e niveleve normale të kolesterolit në gjak.


2. Angjinarja është përdorur në mjekësinë popullore që në lashtësi për të stimuluar punën e mëlçisë, pra për sekretimin e vrerit, i cili i përpunon yndyrnat që i marrim me dietë. Përveç kësaj, janë kryer studime të shumta që vërtetojnë se preparatet e angjinares mund të ndikojnë në nivelin e yndyrës dhe kolesterolit në gjak. Angjinarja ul kolesterolin e lartë, duke ulur nivelin e kolesterolit "të keq" LDL dhe duke rritur kolesterolin "e mirë" HDL. Ky është rezultat i veprimit të saj koleretik, domethënë përmes rritjes së sekretimit të vrerit, për shkak të të cilit mëlçia është në gjendje të shndërrojë kolesterolin në acide biliare. Ndryshe nga statinat, angjinarja nuk e ul sintezën e kolesterolit, por vetëm e rrit zbërthimin e tij. Në këtë mënyrë trupi menaxhon kolesterolin e tepërt, ndërsa niveli i triglicerideve ulet.

Një kombinim i tillë i përbërësve natyralë rekomandohet të përdoret së bashku me ndryshimin e stilit të jetesës (dietë e mirë dhe stërvitje) dhe për një periudhë dymujore vlerat e lipideve kthehen në normale. Për të arritur një efikasitet më të mirë, nuk duhet të konsumohen pije alkoolike gjatë aplikimit. Nuk ka të dhëna për sigurinë e këtyre përbërësve gjatë shtatzënisë dhe laktacionit, ndaj duhet të shmanget përdorimi i saj në këtë popullatë.

Për lexim të hollësishëm të këtij teksti, shihni f.26-27 të botimit elektronik të revistës BETTY (JANAR 2022).