Mezoterapia në trajtimin e alopecisë

Dr. Kosta Cvetkoviq
Specialist i dermatovenereologjisë

|



Alopecia është humbje e flokëve ose e cilësisë së tyre, pas çka flokët dobësohen dhe bien, duke lënë pas zona pa flokë, flokë të brishtë ose rrallim të përgjithshëm. Arsyet janë të shumta, ndërsa më të zakonshmet përfshijnë stresin, çekuilibrin hormonal, moshën, faktorët gjenetikë, marrjen e disa ilaçeve (steroideve), disa sëmundje, stilin e jetesës, çrregullimet psikologjike dhe nganjëherë shtatzëninë. Trajtimi është po aq i gjerë dhe i larmishëm dhe përfshin ilaçe, shtojca, restaurim kirurgjik dhe mbjellje. Një nga ato zgjidhje është edhe tema e sotme, e cila është mezoterapia.

Mezoterapia është një metodë minimale invazive përmes së cilës injektohen kokteje të ndryshme (vitamina, minerale, nxitës), funksioni i të cilave është rivendosja e proceseve natyrore të rritjes së flokëve dhe kështu të zvogëlohet ose çrrënjoset alopecia. Koktejet e lartpërmendura përmbajnë substanca që nxisin inflamacionin lokal dhe bashkë me të edhe rinovimin e gjëndrës, e cila është parakusht themelor për rritjen e flokëve të shëndetshëm. Duke "zgjuar" metabolizmin, aktivizohen një numër procesesh qelizore dhe kështu fillon krijimi i keratinës, e cila përmes depozitimit të saj do të krijojë qime të reja dhe të shëndetshme.

Pjesa tjetër e koktejeve furnizon gjëndrën me lëndë ushqyese thelbësore (vitaminat A, B, C, zink dhe hekur) që do të sigurojnë energji, do të veprojnë si një antioksidant dhe kështu do të parandalojnë të gjithë mekanizmat që do ta pengonin rritjen e shëndetshme. E gjithë metoda përbëhet nga një trajtim gjysmëorësh, që kryhet me një shiringë dhe gjilpërë të hollë të cilat shpohen drejtpërdrejt në pjesën e mesme (mezodermë) të anatomisë së lëkurës së kokës, ku janë enët më të rëndësishme të gjakut dhe gjëndrat e qimeve.

Këto pickime të padhembshme të gjilpërave bëhen skematikisht në të gjithë lëkurën e kokës, për të siguruar një shpërndarje të barabartë të koktejit ushqyes. Përveç një gjilpëre dhe një shiringe, ekzistojnë edhe pajisje të ashtuquajtura meso-gun, të cilat, përmes mekanizimit të procesit të shpimit të lëkurës, eliminojnë momentin e pabarazisë dhe variacioneve që ka dora e njeriut.

Efekti i trajtimit nuk ndodh menjëherë dhe nevojiten më shumë trajtime. Rekomandohet që ky lloj mezokokteji të kryhet një herë në javë, për një periudhë prej 8 javësh mesatarisht. Sigurisht, ky është rekomandim i përgjithshëm, kurse rezultatet dhe koha ndryshojnë nga pacienti në pacient. Rezultatet e para të mëdha, të dukshme, shihen pas trajtimit të 5-të.

Nuk ka efekte anësore nga trajtimet, përveç mbindjeshmërisë së mundshme alergjike ndaj disa prej përbërësve të koktejit, por është detyra e dermatologut të pyesë nëse ka histori pozitive të ndonjë alergjie dhe / ose sëmundjeje që do të ishte e rëndësishme për trajtimin e suksesshëm. Kundërindikimet për këtë trajtim janë proceset infektive lokale në lëkurën e kokës, që mund të hyjnë në qarkullimin e gjakut gjatë shpimit dhe të çojnë në sepsë. Probleme të tjera shëndetësore ku nuk rekomandohet ky trajtim janë hemofilia, marrja e disa ilaçeve të rënda, pezmatimi kronik i lëkurës dhe diabeti.

Duhet të theksohet dhe është me shumë rëndësi që trajtimi të kryhet nga një profesionist i duhur apo një dermatolog specialist, i cili duhet të shqyrtojë dhe vlerësojë gjendjen dhe të zgjedhë koktejin më të përshtatshëm për secilin pacient veç e veç. Nëse kryhet nga njerëz të pakualifikuar, rreziku i efekteve anësore është shumë më i lartë.

Në fund të trajtimit, pacienti rifiton numrin e qimeve, shkëlqimin dhe cilësinë, por kjo nuk do të thotë që nëse nuk tregohet kujdes, ky rezultat do të zgjasë. Nuk duhet të harrojmë se kishte një arsye pse flokët ranë në radhë të parë, kështu që ne rekomandojmë fuqimisht që të kujdeseni veçanërisht për trupin, të zvogëloni marrjen e toksinave nga ushqimi me cilësi të dobët, të ushtroni dhe natyrisht të përdorni preparatet e duhura për kujdesin e tyre.

Për lexim të hollësishëm të këtij teksti, shihni f.26-27 të botimit elektronik të revistës BETTY (KORRIK 2021).