Skuqja dhe puçrrat e shkaktuara nga pelena

prim. dr. Lidija Biserkoska Atanasovska
dermatovenerolog
Re-Medika

|



Puçrrat e shkaktuara nga pelena janë të shpeshta te foshnjat gjatë vitit të parë të jetës dhe shpeshherë shoqërohen me lagështi të vazhdueshme në zonën e pelenës. Mund të ndodhin edhe pasi fëmija të fillojë të hajë ose nëse merr antibiotikë. Rrallëherë mund të shfaqet te foshnjat që ushqehen me gji, nëse nëna konsumon ushqime të caktuara.
Skuqja ose puçrrat nën pelena zakonisht gjenden aty ku pelena prek lëkurën e foshnjës, si vithet, kofshët dhe organet gjenitale. Ndonjëherë skuqja mund të përflaket dhe të shfaqen fshika, puçrra, plagë ose ënjtje e lëkurës.

Çfarë e shkakton skuqjen dhe puçrrat në zonën e pelenës

Skuqja te foshnjat është një dukuri shumë e zakonshme, sepse lëkura e foshnjave është tejmase e butë. Ka shumë arsye për shfaqjen e saj:

• Nëse pelena është shumë e shtrënguar, veçanërisht nëse skajet e saj fërkohen me lëkurën e foshnjës.


• Nëse pelena nuk ndërrohet mjaft shpesh. Në këtë rast, urina dhe jashtëqitja e pezmatojnë lëkurën delikate.


• Skuqja shpesh ndodh kur fëmija fillon të hajë ushqime të forta. Herë pas here mund të vijë deri te skuqja gjatë ushqyerjes me gji të foshnjës suaj, si dhe nga ndonjë ushqim që keni ngrënë, siç janë domatet ose produktet e tyre.


• Ndonjëherë skuqja shfaqet nëse përdorni pelena dhe peceta të lagura që nuk i përshtaten foshnjës, nëse përdorni zbardhues ose zbutës të rrobave kur lani pelenat, nëse pluhuri nuk shpëlahet mirë etj.


• Përdorimi i antibiotikëve nga nëna që ushqehet me gji ose nëse merren nga foshnja. Antibiotikët prishin ekuilibrin e baktereve të mira dhe e bëjnë lëkurën më të ndjeshme ndaj infeksioneve.


• Përdorimi i brekëve mbrojtëse prej najloni mbi pelenë, nuk e lejon lëkurën që të marrë frymë dhe lagështia mbahet brenda, duke rritur kështu shanset për shfaqjen e skuqjes.


• Infeksion bakterial ose fungal - sepse mjedisi i ngrohtë dhe i lagësht i pranishëm në zonën e pelenave është një terren i mirë për mbarështimin e baktereve dhe kërpudhave.


• Lëkura e ndjeshme, siç është dermatiti atopik ose ekzema

Simptomat kryesore të skuqjes së shkaktuar nga pelena janë:

• Skuqje, lëkurë e ënjtur dhe e tendosur në zonën e pelenës, ku përfshihen vithet, kofshët dhe organet gjenitale.


• Foshnja ndihet në siklet, shpesh është e mërzitur dhe qan kur ia lani prapanicën me ujë ose kur ia fshini.

Si të parandaloni skuqjen e shkaktuar nga pelena

Gjëja më e rëndësishme është që ta mbani gjithmonë prapanicën e foshnjës të pastër dhe të thatë.

• Kontrolloni pelenën e foshnjës sa më shpesh të jetë e mundur dhe ndryshojeni sapo të laget ose ndotet.


• Pastroni me kujdes të gjithë zonën kur e ndërroni pelenën. Është mirë të përdorni ujë të ngrohtë për ta larë foshnjën.


• Lëreni lëkurën e foshnjës të thahet plotësisht para se t'ia vini pelenën e re.


• Lëreni fëmijën pa pelenë sa më shumë që të jetë e mundur. Sidomos kur skuqja tashmë është shfaqur. Lëreni fëmijën pa pelenë dhe pa krem me qëllim që skuqja të thahet, gjë që është një pjesë e rëndësishme e procesit të shërimit.


• Mos përdorni kremra që përmbajnë acid borik, kamfor, fenol ose metil salicilat. Këto substanca mund të jenë të dëmshme.


• Shmangni pecetat e lagura që përmbajnë alkool ose erë.


• Mund të përdorni një krem mbrojtës me oksid zinku që vihet në një shtresë të hollë në lëkurën e prekur disa herë gjatë ditës. Ky krem mund të përdoret edhe në lëkurë të shëndetshme për të parandaluar puçrrat e shkaktuara nga pelena.


• Nëse lëkura e foshnjës suaj është e kuqe, përdorni shtresë më të trashë kremi.


• Shmangni brekët mbrojtëse prej najloni.


• Pas larjes, mos e fërkoni lëkurën e foshnjës me peshqir, por thitheni ujin. Fërkimi mund të pezmatojë lëkurën.


• Nëse skuqja vazhdon, ndryshoni llojin e pelenave, pecetave të lagura, sapunit, etj.


• Nëse skuqja vazhdon ose infektohet, konsultohuni me mjekun e foshnjës suaj.


• Gjithashtu konsultohuni me mjekun tuaj nëse skuqja shfaqet te fëmija juaj në 6 javët e para të jetës.

Skuqja e shkaktuar nga pelena zakonisht kalon brenda pak ditësh dhe nuk ka nevojë të shkoni te mjeku, por telefononi pediatrin tuaj nëse vëreni shenjat e mëposhtme:

• Skuqje e rëndë


• Skuqja përkeqësohet pavarësisht masave të marra


• Ka temperaturë


• Ka qelb dhe flluska


• Përgjumje e foshnjës

Për lexim të hollësishëm të këtij teksti, shihni f.30-31 të botimit elektronik të revistës BETTY (SHTATOR 2021).