Kujdesi për kafshën tuaj shtëpiake

Lavinija Perunovski,
Kujdestare estetike profesionale e qenve

|



Si ia dilni në krye me kafshët shtëpiake që janë të shqetësuara apo që kanë frike?

Shkaku i frikës te kafshët shtëpiake është zakonisht vizita me vonesë te kujdestari estetik i qenve (mbi 10 muajsh) ose njohja e gabuar e trajtimit dhe mjeteve që përdoret. Kur një qenush i ri njihet me kohë me zhurmën e tharëses së flokëve dhe dridhjet e makinës, më vonë, vizita te kujdestari estetik dhe vetë trajtimi do t'i bëhet aktivitet i zakonshëm. Nëse qeni që ka frikë është tashmë i rritur, punohet ngadalë dhe me kujdes, madje ndonjëherë vetë trajtimi nuk bëhet i plotë, me qëllim që të mësohet me të. Në raste të tilla, nevojitet kohë dhe durim, ndonjëherë një vit ose më shumë, por gjithmonë ka reagime pozitive.

Çfarë duhet bërë përpara se pronari të sjellë kafshën shtëpiake te ju?

Nuk duhet bërë asgjë e veçantë. Unë jam ajo që e kam për detyrë t'u jap pronarëve udhëzime për mirëmbajtjen dhe kujdesin e duhur të kafshës shtëpiake ndërmjet trajtimeve, zgjedhjen e duhur të furçave dhe larjen e duhur, ndaj nëse pronari ka ndonjë pyetje, i diskutojmë ato. Nëse është racë këlysh me një pamje specifike, flasim për modelin e flokëve, krahasojmë fotot dhe idetë dhe në fund marrin atë që dëshirojnë.

Sa e rëndësishme është të kujdesemi rregullisht për pamjen e kafshës shtëpiake dhe pse?

Mirëmbajtja e rregullt, si në shtëpi ashtu edhe te kujdestari estetik, ka një rëndësi të madhe, sepse vetëm kështu mund të kemi një kafshë shtëpiake të shëndetshme. Disa raca, të cilat aktualisht janë të pëlqyera, janë shumë kërkuese në këtë drejtim dhe kërkojnë shumë krehje në shtëpi. Mosmirëmbajtja çon në ngatërrim të qimeve dhe, rrjedhimisht, në mungesën e zgjedhjes kur është fjala për modelin e flokëve. Kjo nënkupton se kafsha shtëpiake duhet medoemos të qethet shkurt, gjë që, më besoni, nuk është dëshira e asnjë kujdestari estetik. Të gjithë duan që kafshët shtëpiake të dalin të bukura dhe të rregullta nga salloni, por leshi duhet të mirëmbahet edhe në shtëpi. Ashtu si dhëmbët, që nuk na i lanë dentisti, por ne vetë kujdesemi për higjienën orale dhe e vizitojmë dentistin sipas nevojës, edhe leshi i kafshëve shtëpiake është i njëjtë, pra duhen shprehi të shëndetshme dhe të rregullta për një kafshë shtëpiake të shëndetshme.

Cila është pjesa më argëtuese dhe cila është pjesa më e vështirë e punës suaj?

Meqenëse nuk punoj me qen agresivë, disa nga punët e mia nuk i shoh si të lehta apo të vështira. Çdo racë ka kërkesat e veta dhe standardin e vet, kështu që, sa herë që mbërrij në fund, është kënaqësi të shoh rezultatin e punës. Në përgjithësi, puna me qen është një gjë krijuese dhe e mrekullueshme.

Për lexim të hollësishëm të këtij teksti, shihni f.28 të botimit elektronik të revistës BETTY (MARS 2022).