Infeksionet vaginale gjatë verës – si të mbrohemi

Vera sjell shumë bukuri – diell, det, rroba të lehta dhe më shumë kohë në natyrë. Por, së bashku me kënaqësinë, muajt verorë sjellin edhe disa rreziqe kur bëhet fjalë për shëndetin intim të gruas. Temperaturat e larta, djersitja e shtuar dhe ambienti i lagësht krijojnë kushte ideale për zhvillimin e infeksioneve vaginale. Ky lloj infeksioni nuk është i pazakonshëm, por nëse njihen në kohë dhe parandalohen si duhet, mund të shmangen lehtësisht.
Infeksionet kërpudhore janë më të shpeshta, sidomos ato të shkaktuara nga Candida albicans, si dhe vaginozat bakteriale. Këto gjendje shfaqen më së shpeshti me shkarkim vaginal të pakëndshëm, ndjesi kruarje, djegie, ënjtje ose erë të keqe. Edhe pse nuk janë serioze nëse trajtohen në kohë, ato mund të ndikojnë ndjeshëm në rehati dhe cilësinë e pushimeve verore.

Pse vera është e rrezikshme për shëndetin intim?
Në periudhën e verës, kombinimi i lagështisë, nxehtësisë dhe qarkullimit të kufizuar të ajrit krijon kushte të favorshme për rritjen e mikroorganizmave. Veshja e gjatë e kostumeve të lagura pas larjes në det ose pishinë e mban trupin në gjendje të lagësht, duke nxitur shfaqjen e infeksioneve. Rrobat e brendshme sintetike dhe ato të ngushta nuk lejojnë lëkurën të marrë frymë dhe përkeqësojnë problemin me lagështinë e tepërt. Larja në pishina dhe det, edhe pse freskuese, gjithashtu dëmton balancën natyrale të pH-së së vaginës. Klori në pishina, si dhe bakteret në ujin e detit, mund të irritojnë mukozën e ndjeshme. Për më tepër, përdorimi i sapunëve agresivë, larjet e shpeshta me peceta të lagura ose sprejët për higjienën intime me parfume, prishin mikroflorën natyrale dhe krijojnë një disbalancë.

Si të mbrohemi?
Parandalimi është gjithmonë më i mirë se trajtimi. Prandaj, disa zakone të thjeshta, por efektive mund të ulin ndjeshëm rrezikun nga infeksioni:
Vishni rroba të brendshme pambuku, sepse materialet natyrore lejojnë lëkurën të marrë frymë dhe thithin lagështinë. Shmangni rrobat e ngushta, veçanërisht kur temperaturat janë të larta.
Pas larjes, ndryshoni kostumin e banjës sa më shpejt që të jetë e mundur. Mos e lini trupin në rroba të lagura për një kohë të gjatë.
Higjiena intime duhet të jetë e butë dhe e balancuar – përdorni produkte me pH neutral dhe pa aromë. Larja e tepruar ose përdorimi i sapunëve agresivë bën të kundërtën e mbrojtjes – heq barrierën natyrale mbrojtëse.
Është e këshillueshme të pini mjaft ujë, të mbani higjienë të përgjithshme dhe me simptomat e para si kruajtje, shkarkim i pakëndshëm apo djegie, të konsultoheni me farmacistin ose gjinekologun.

A ndihmojnë probiotikët?
Gjithnjë e më shumë gra sot përdorin probiotikë për shëndetin intim, qoftë oralisht apo lokal. Ata ndihmojnë në ruajtjen e florës normale vaginale dhe janë veçanërisht të dobishëm në periudha ndryshimesh hormonale, udhëtimeve apo pas trajtimit me antibiotikë. Në farmaci ekzistojnë probiotikë të formuluar posaçërisht për shëndetin intim të grave, të cilët mund të përdoren edhe parandalueshëm, veçanërisht gjatë verës.

Në fund – dëgjoni trupin tuaj
Më e rëndësishmja është gjithmonë të dëgjoni trupin tuaj dhe të mos injoroni simptomat e para. Infeksionet vaginale nuk janë tabu dhe nuk duhet të keni turp të kërkoni këshilla. Si farmaciste, gjithmonë jam këtu për t’ju ndihmuar me rekomandime për terapi të përshtatshme, këshilla për parandalim dhe kujdes për higjienën intime. Vera është për t’u shijuar – mos lejoni që një shqetësim t’ju prishë pushimet.

Shkruan
Dr. Tanja Veličkovska