Si të përdoren saktë antibiotikët

Pse përdorimi i përgjegjshëm është thelbësor për shëndetin tuaj dhe për shëndetin e gjeneratave të ardhshme.

Antibiotikët janë një nga zbulimet më të mëdha në mjekësinë moderne.
Falë tyre, sot trajtojmë me sukses infeksione që vetëm disa dekada më parë ishin fatale. Por, efikasiteti i tyre i fuqishëm sjell edhe një përgjegjësi të madhe. Përdorimi i gabuar dhe i tepruar i antibiotikëve çon në shfaqjen e baktereve rezistente – mikrobe që nuk reagojnë më ndaj ilaçit. Kjo përbën një kërcënim global për shëndetin publik.
Kur përdoren antibiotikët
Antibiotikët janë efektivë VETËM kundër infeksioneve bakteriale – si angina streptokokale, disa pneumoni, infeksione urinare etj.
Ata NUK veprojnë ndaj infeksioneve virale, si ftohja, gripi, bronkiti viral ose COVID. Marrja e tyre pa nevojë, jo vetëm që nuk ndihmon, por mund të dëmtojë.

Si t’i përdorim siç duhet
1. Gjithmonë me rekomandim të mjekut – Asnjëherë në mënyrë të pavarur apo sipas këshillës së dikujt tjetër.
2. Trajtim i plotë – Edhe nëse simptomat ndalojnë, terapia duhet përfunduar deri në fund për të shkatërruar të gjitha bakteret.
3. Në kohën dhe dozën e saktë – Dozat e humbura e ulin efektin dhe rrisin rezistencën.
4. Mos i ndani antibiotikët me të tjerë – Ilaçi që ka ndihmuar një pacient, mund të jetë i gabuar për tjetrin.
5. Mos përdorni antibiotikë të mbetur nga terapi të mëparshme – Çdo infeksion kërkon antibiotikun e vet të përshtatshëm.

Pasojat e abuzimit
- Rezistenca bakteriale – bakteret që mbijetojnë bëhen më rezistente dhe më të vështira për t’u trajtuar.
- Efekte anësore – nga probleme gastrointestinale deri te reaksione alergjike serioze.
- Prishja e mikrobiomës – bakteret e dobishme në trup shkatërrohen, gjë që çon në probleme të reja shëndetësore.

Çfarë mund të bëjmë

Si pacientë – të jemi të përgjegjshëm dhe të informuar.
Si punonjës shëndetësorë – të edukojmë dhe të përshkruajmë antibiotikë vetëm kur janë vërtet të nevojshëm.
Si shoqëri – të punojmë në fushata për ngritjen e ndërgjegjësimit.
Antibiotikët shpëtojnë jetë – por vetëm nëse i përdorim me mençuri.

 

Shkruan
Dr. Tanja Velichkovska