KTHIMI NË RUTINË: DIABETI DHE HIPERTENSIONI PAS VERËS

Pas muajve të pushimeve, udhëtimeve dhe tundimeve verore, për shumë persona me sëmundje kronike – veçanërisht diabet dhe hipertension – vjen koha për t’u rikthyer në rutinën shëndetësore. Vera sjell relaksim, por edhe ndryshime të shpeshta në ushqim, aktivitet fizik dhe madje në marrjen e rregullt të terapisë. Prandaj, shtatori është muaji ideal për kontroll shëndetësor dhe konsultim me mjekun amë dhe farmacistin.

Kontrolli i terapisë – hapi i parë drejt stabilitetit
Pas muajve verorë, është e rëndësishme:
Të matet tensioni i gjakut disa herë gjatë ditës dhe të regjistrohen vlerat
Të bëhet kontroll laboratorik: glukoza, HbA1c, profili i lipideve, kreatinina dhe elektrolitet
Të kontrollohet pesha trupore dhe indeksi i masës trupore – shtesat e vogla shpesh kalojnë pa u vënë re
Të konfirmohet nëse terapia është ende e përshtatshme – mund të nevojitet ndryshim në dozë ose lloj medikamenti

Farmacitë mund të ofrojnë matje dhe këshilla falas, ndërsa farmacisti të ndihmojë me kujtesë për marrjen e saktë të terapisë.

DIABETI: KTHIMI NË KONTROLLIN GLIKEMIK
Vera shpesh sjell:
Më shumë sheqer në ushqim (akullore, fruta, alkool)
Vakte të parregullta
Doza të humbura të insulinës ose tabletave
Prandaj, është e rëndësishme:
Të rikthehet ushqimi i rregullt – i pasur me fibra dhe pa sheqerna të përpunuar.
Të përfshihet aktivitet fizik i moderuar – shëtitje, ushtrime të lehta.
Të ndiqet glikemia në shtëpi, nëse është e mundur me ditar.

HIPERTENSIONI: RREZIK I HESHTUR PAS PUSHIMVE

Tensioni mund të ndryshojë gjatë verës, sidomos për shkak të:
Nxehtësisë dhe dehidratimit
Terapisë së parregullt
Me kthimin në rutinë:
Rekomandohet matja e rregullt e tensionit – në mëngjes dhe në mbrëmje
Të kihet kujdes me marrjen e kripës dhe alkoolit
Të shmangen ndërprerjet e papritura të terapisë
Farmacistët luajnë një rol kyç në edukimin për vetëkontroll, përzgjedhjen e aparateve dhe rekomandimet për suplementë si koenzima Q10, magnez ose kalium, sipas këshillës së mjekut.

Përfundim

Le të jetë shtatori muaji kur pacientët me diabet dhe hipertension të bëjnë një “restart”. Me mbështetje të vogël, kontrolle të rregullta dhe disiplinë terapeutike, ata mund të hyjnë në vjeshtë me shëndet më të mirë dhe cilësi më të mirë të jetës.

Shkruan
Dr. Tanja Velichkovska