Rekonstruksioni i gjirit pas mastektomisë: Një shans për një fillim të ri për gratë në Maqedoni

Çdo grua e katërt në Maqedoni përballet me kancerin e gjirit, një sëmundje që, fatkeqësisht, shpesh çon në mastektomi – heqjen kirurgjikale të gjirit. Megjithatë, ekzistojnë zgjidhje të avancuara mjekësore që mundësojnë rindërtimin e gjirit dhe rikthimin e pamjes fizike, duke përmirësuar ndjeshëm shëndetin psikologjik të pacienteve.

Rindërtimi i gjirit përbëhet nga një procedurë kirurgjikale me qëllim rikthimin e formës dhe madhësisë së gjirit sa më afër pamjes së tij të mëparshme. Kjo procedurë mund të kryhet menjëherë pas heqjes së kancerit (e njohur si Immediate breast reconstruction) ose pas një periudhe të caktuar, pas përfundimit të kimioterapisë dhe radioterapisë, e njohur si rindërtim i vonuar.
Llojet e rindërtimit
Rindërtimi me implante – Në fazën e parë, përdoren implante për të rindërtuar gjirin. Nëse nuk ka mjaftueshëm inde, vendoset një ekspander që gradualisht mbushet për të arritur volumin e dëshiruar. Në fazën e dytë, ekspanderi zëvendësohet me një implant. Ky metodë është e njohur, por nuk rikthen ndjeshmërinë në gjirin e rindërtuar.
Rindërtimi me inde trupore – Kjo metodë përdor inde nga trupi i pacientes, zakonisht nga barku (TRAM ose DIEP flap) ose nga shpina (Latissimus dorsi flap), për të rindërtuar gjirin. Këto metoda krijojnë një pamje më natyrale, por janë më invazive dhe kërkojnë më shumë ndërhyrje kirurgjikale.
TRAM flap përfshin zhvendosjen e muskujve dhe indeve të barkut për të rindërtuar gjirin. Ekzistojnë dy variante të kësaj metode: TRAM flap pedikulare dhe TRAM flap e lirë. E fundit ofron rezultate më të mira estetike, por është më e ndërlikuar për t’u kryer.
Latissimus dorsi flap përfshin zhvendosjen e indeve nga pjesa e sipërme e shpinës dhe shpesh kombinohet me një implant për të arritur madhësinë e dëshiruar.
DIEP flap është metoda më e avancuar, e cila përdor vetëm lëkurën dhe indin dhjamor të barkut, pa prekur muskujt, duke reduktuar ndjeshëm rrezikun e dhimbjeve dhe komplikimeve pas operacionit.

Rindërtimi i areolës dhe mamillës
Në disa raste, rindërtimi i areolës dhe mamillës bëhet në fazën e dytë ose të tretë të rindërtimit. Ky është një hap i rëndësishëm estetik që ndihmon në krijimin e një pamjeje natyrale dhe të plotë të gjirit të rindërtuar..

Komplikimet e mundshme:
Edhe pse rindërtimi i gjirit përmirëson ndjeshëm rezultatet estetike dhe mirëqenien psikologjike, si çdo ndërhyrje kirurgjikale, ai ka rreziqet e veta. Komplikimet e mundshme përfshijnë:
- Infeksione
- Gjakderdhje
- Formim të seromës (grumbullim i lëngjeve nën gjirin e rindërtuar)
- Nekrozë të indeve
- Formim të hernies
- Humbje të ndjeshmërisë

Më shumë se një procedurë estetike
Rindërtimi i gjirit nuk është vetëm një ndërhyrje estetike, por një pjesë e rëndësishme e trajtimit për pacientet me kancer të gjirit. Me këtë ndërhyrje, gratë jo vetëm që rikthejnë pamjen e trupit të tyre, por edhe shëndetin e tyre psikologjik dhe vetëbesimin, që janë thelbësore për mirëqenien e tyre të përgjithshme.
Rindërtimi i gjirit jep një mundësi të re për jetë, duke i ofruar pacienteve ndjenjën e përmbushjes dhe kontrollit mbi trupin e tyre. Zgjedhja e llojit të rindërtimit varet nga nevojat individuale të pacientes, mosha, faza e sëmundjes dhe rezultatet e trajtimeve. Më e rëndësishmja, rindërtimi i gjirit u jep grave shpresë të re dhe një jetë pa frikën e transformimit të tyre fizik.

 

Dr. Jasmina Gjorgievska
Specialiste e Kirurgjisë së Përgjithshme,
Subspecialiste e Kirurgjisë Plastike dhe Rekonstruktive