Riniti alergjik sezonal

Riniti është një gjendje që ndikon në cilësinë e jetës së shumë njerëzve. Ekzistojnë riniti alergjik dhe riniti vazomotor ose joalergjik.

Alergjia përfaqëson një mbindjeshmëri të sistemit imunitar të njeriut ndaj disa ndikimeve të jashtme, kur ai bie në kontakt me alergjenin përmes lëkurës, ajrit ose ushqimit.
Riniti alergjik sezonal përfshin në nivel global rreth 20% të të gjitha reaksioneve alergjike.
Shkaktarët më të shpeshtë të rinitit alergjik sezonal janë: poleni i pemëve, poleni i barit, poleni i barërave të këqija, alergjenët nga myku etj. Ai shfaqet në periudha të ndryshme të vitit, në varësi të shkaktarit.
Riniti alergjik është inflamacion i mukozës së hundës dhe shumë i ngjan një ftohjeje që zgjat më gjatë: rrjedhje e hundës, gërvishtje në fyt, teshtima, kruarje e hundës, lotim i syve. Simptomat shfaqen periodikisht dhe është shumë e rëndësishme njohja e tyre në kohë dhe trajtimi, sepse një pjesë e këtyre pacientëve mund të zhvillojnë astmë ose t’u përkeqësohen simptomat e një astme tashmë ekzistuese në një periudhë të mëvonshme.
Terapia përfshin barna nga grupet e antihistaminikëve, dekongjestivëve, kortikosteroideve nazale, antikolinergjikëve, bllokuesve të leukotrieneve, imunoterapi ose një lloj vaksine kundër shkaktarit të njohur, etj. Më e rëndësishmja nga të gjitha është njohja dhe detektimi i shkaktarit përmes testeve alergologjike, me qëllim shmangien e alergjenit, nëse është e mundur, ose mosqëndrimin në ambiente të hapura në natyrë ku është i pranishëm alergjeni ndaj të cilit personi është alergjik. Nëse ka pasur qëndrim në natyrë, rekomandohet dush dhe ndërrim i rrobave.

Shkruan
Dr. Zorica Dafkov, specialiste e mjekësisë familjare Rinit
Ordinancë private shëndetësore e mjekësisë së përgjithshme “Celsius Nova”, Kavadarci