Saccharomyces boulardii – shumë më shumë se një probiotik i thjeshtë

Po dëgjojmë gjithnjë e më shumë për probiotikët dhe përfitimet e tyre për shëndetin tonë. Mendimi i parë që na vjen është për “bakteret e mira” dhe rëndësinë e tyre për tretjen normale të ushqimit, një metabolizëm të shëndetshëm, si dhe ruajtjen e imunitetit tonë. Megjithatë, kohët e fundit një kërpudhë po dominon gjithnjë e më shumë në botën e probiotikëve dhe gradualisht po e zëvendëson primatin e baktereve si probiotiku më i përdorur. Bëhet fjalë për Saccharomyces cerevisiae var. boulardii, një kërpudhë e majave, e cila ka efekte të shumëfishta dhe të dobishme në organizmin e njeriut. Ajo është një nga probiotikët më të studiuar në botë, me shumë efekte të vërtetuara klinikisht.

Çfarë bën ajo në fakt kur hyn në organizmin tonë dhe cili është mekanizmi i veprimit me të cilin ndihmon shëndetin tonë? Përgjigjja nuk është e thjeshtë, kjo kërpudhë nëpërmjet një sërë proceseve komplekse mundëson funksionim më të mirë, sidomos të sistemit tretës, urinar dhe imunitar.

Saccharomyces boulardii po bëhet gjithnjë e më shumë pjesë e preparateve probiotike (si vetëm apo në kombinim) që jepen për trajtimin e diarresë me origjinë të ndryshme. Kjo është për shkak të karakteristikave të shkëlqyera që ka:
• Ka rritje optimale në temperaturën e trupit – 37 °C
• Përballon kalimin në të gjitha pjesët e traktit tretës
• Është rezistent ndaj pH-së së ulët dhe kripërave të tëmthit
• Është natyralisht rezistent ndaj antibiotikëve!
• Nuk kolonizon traktin tretës – largohet nga jashtëqitja pas 3-5 ditësh nga ndalimi i përdorimit
Në të njëjtën kohë, efektet pozitive i tregon në disa mënyra:
1. Inhibim i toksinave – nëpërmjet bllokimit të receptorëve për toksinat bakteriale dhe shkatërrimit të drejtpërdrejtë të toksinave bakteriale
2. Veprim antimikrobik – ndalon rritjen e patogjenëve dhe ruan funksionet ndërqelizore
3. Imunomodulues – rrit koncentrimin e IgA (veprim anti-inflamator)
4. Rikthim i florës normale intestinale – ky probiotik shkurton ndjeshëm periudhën e rikuperimit të florës intestinale pas trajtimit me antibiotikë
5. Ruajtje e aktiviteteve metabolike – ndikon pozitivisht në metabolizmin e zorrëve duke rritur koncentrimin e acideve yndyrore me zinxhir të shkurtër
Saccharomyces boulardii ka efekt pozitiv në zvogëlimin e kolonizimit të H. pylori në sistemin gastro-intestinal të njeriut, edhe pse nuk mund ta eliminojë atë kur përdoret vetëm si terapi e vetme. Studime të shumta tregojnë se suplementimi me S. boulardii në terapinë standarde për eliminimin e H. pylori rrit ndjeshëm përqindjen e shërimit dhe ul incidencën e efekteve të padëshiruara gastro-intestinale gjatë trajtimit.
Një tjetër veprim i kësaj kërpudhe që po përdoret gjithnjë e më shumë është aftësia e saj “antimikrobike.” Ajo zvogëlon numrin e baktereve patogjene Escherichia coli në sistemin tretës. Me mbulesën e saj ngjitëse të jashtme, ku lidhen bakteret Escherichia coli, ajo ndihmon që ato të largohen nga trupi. Me këtë mekanizëm neutralizon E. coli në zorrë, zvogëlon popullatën e kësaj bakterie në trup dhe parandalon përhapjen e saj në traktin urinar. Me këtë mekanizëm të veprimit Saccharomyces boulardii ka siguruar vendin e saj edhe në preparatet natyrale që përdoren për trajtimin e infeksioneve urinare.

Shkruan
Mr. farm. Ljubica Jakimovska