Takikardi apo lodhje? Njihni simptomat e çrregullimeve të tiroides

Simptomat e gjëndrës tiroide tepër aktive (hipertiroidizëm)
Simptoma kryesore është rritja e aktivitetit të zemrës – takikardia dhe rrahjet e zemrës që ndihen gjatë gjithë ditës dhe natës. Kjo shpesh shoqërohet me djersitje të tepruar dhe humbje në peshë. Humbja në peshë shpeshherë është e pashpjegueshme për pacientin, sepse, përkundrazi, ata hanë më shumë dhe kanë oreks të shtuar, por megjithatë pesha u bie.
Mund të paraqitet edhe dridhje e duarve (tremor). Këto janë dridhje të imëta, ndryshe nga dridhjet më të mëdha që ndodhin te të moshuarit. Ndodhin edhe ndryshime në lëkurë – ajo bëhet e kuqe dhe e djersitur. Fillon edhe rënia e flokëve. Te gratë shpesh ndodh mungesë e menstruacioneve. Në disa lloje të hipertiroidizmit paraqiten edhe ndryshime okulare: sytë dalin përpara nga zgavrat (eksophthalmus).
Nëse sëmundja nuk njihet dhe nuk trajtohet me kohë, ajo përkeqësohet dhe në mungesë të ndërhyrjes mund të përfundojë me fatalitet. Kjo gjendje shpesh ndikon edhe në sjellje – personat bëhen nervozë, lehtë hyjnë në konflikt dhe kanë çrregullime të gjumit.

Simptomat e gjëndrës tiroide nënaktive (hipotiroidizëm)
Simptomat në këtë rast janë të kundërta. Njerëzit fillojnë të shtojnë peshë. Shfaqen ënjtje, më së shumti në fytyrë dhe veçanërisht në mëngjes. Fryhen kapakët e syve, buzët, pjesa e poshtme e këmbëve dhe në raste të rënda – edhe barku.
Ndryshon edhe mënyra e të folurit: zëri bëhet i hollë, i ngjashëm me zërin e të moshuarve – kalon nga zë femëror në mashkullor dhe bëhet i pakëndshëm për dëgjim. E folura ngadalësohet – personi shqipton më pak fjalë në njësi kohe, harron dhe ka vështirësi të shprehë mendimet. Krahas kësaj, ndjehet edhe nevojë e madhe për gjumë gjatë ditës. Shumicën e kohës pacientët qëndrojnë në shtrat, pa energji për funksione të përditshme.
Pulsi bëhet i ngadalshëm dhe ndonjëherë ka ndërprerje në rrahje. Nëse nuk trajtohet, fytyra merr formë të fryrë (“fytyrë mishi”), personi shton peshë, humb qimet në trup dhe lëkura bëhet e ashpër, si lëkura e elefantit – gjendje që njihet si mixedema, forma më e rëndë e sëmundjes.

Shkruan:
Ronald Duka,
Dr. Spec. në kirurgjinë torakale