Враќање во рутина: Дијабет и хипертензија по летото

По месеците на одмор, патувања и летни искушенија, за многумина со хронични болести – особено дијабетес и хипертензија – доаѓа време за враќање во здравствена рутина. Летото носи опуштеност, но и чести промени во исхраната, физичката активност, па дури и во редовното земање терапија. Затоа, септември е идеален месец за контролна здравствена проверка и консултација со матичен лекар и фармацевт.
Проверка на терапијата – прв чекор кон стабилност
По летните месеци, важно е:
Да се измери крвниот притисок неколку пати во текот на денот и да се запишат вредностите
Да се направи лабораториска контрола: гликоза, HbA1c, липиден профил, креатинин и електролити
Да се провери телесната тежина и индекс на телесна маса – малите зголемувања често минуваат незабележано
Да се потврди дали терапијата е сè уште соодветна – можеби е потребна промена на доза или тип на лек.
Аптеките може да понудат бесплатни мерења и совети, а фармацевтот да помогне во потсетување за правилно земање на терапијата.

Дијабет: Повраток на гликемиска контрола
Летото често носи:
Повеќе шеќер во исхраната (сладоледи, овошје, алкохол)
Нерегуларни оброци
Пропуштени дози инсулин или таблети.
Затоа, важно е:
Повторно да се воспостави редовна исхрана – богата со влакна и без преработени шеќери.
Да се вклучи умерена физичка активност – прошетки, лесно вежбање.
Да се следи гликемијата дома, ако е можно со дневник.
Хипертензија: Тивок ризик по одморите
Притисокот може да варира за време на летото, особено поради:
Топлина и дехидрација
Неправилна терапија.
Со враќањето во рутина:
Се препорачува редовно мерење на притисокот, наутро и навечер
Да се внимава на внесот на сол и алкохол
Да се избегнуваат нагли прекини на терапијата.
Аптекарите играат клучна улога во едукација за самоконтрола, избор на апарати и препораки за додатоци како коензим Q10, магнезиум или калиум, според совет од лекар.

Заклучок
Септември нека биде месецот кога пациентите со дијабет и хипертензија ќе направат „рестарт“. Со мала поддршка, редовни контроли и добра терапевтска дисциплина, можат да влезат во есента со стабилно здравје и подобар квалитет на животот.

Пишува
Д-р Тања Величковска