Зошто е важен витаминот Д3?

Габриела Качакоска-Нанеска
Дипломиран фармацевт
ПЗУ АПТЕКА БИОЛЕК 3, ПРИЛЕП

|



Витаминот Д претставува липосолубилен витамин, односно витамин што се раствора во масти. Овие витамини се складираат во телото на човекот и се создаваат резерви, за разлика од хидросолубилните витамини кои се растворливи во вода и вишокот од нив се исфрла преку урината.

Постојат две форми на витамин Д: витамин Д₃ (холекалциферол) и витамин Д₂ (ергокалциферол).

Витаминот Д₃ е поефикасен во зголемување на концентрацијата во неговата активна форма во организмот, за разлика од витаминот Д₂.

Главни извори на витамин Д_{3 (холекалциферол) се сонцето, храната и додатоците на исхраната.} Витаминот Д₃ е единствениот Д витамин кој може телото да го произведува, благодарение на сончевата светлина неговата синтеза започнува во кожата. Тој претставува важен елемент за метаболизмот на калциум и фосфор, со тоа што овозможува нивна ресорпција и складирање во коските. Бидејќи сè поголем број луѓе го избегнуваат сонцето, неговата примена е неопходна преку додатоци на исхрана со цел да се добие потребната количина на витамин Д₃.

Неговата улога во целиот организам е многу важна:

• Како имуномодулатор има големо влијание во штитењето од вирусните и бактериските заболувања;


• Здрави коски кај постари лица, бидејќи како што спомнавме учествува во метаболизмот на калциум и фосфор и на тој начин превенира од остеопороза;


• Важен елемент кај деца и новороденчиња со тоа што заштитува од појава на алергии од храна, зголемен крвен притисок, ризик од појава на астма.

Недостигот на витамин Д₃ е најмногу изразен во зимскиот период од годината, бидејќи во овие месеци телото не произведува витамин Д поради тоа што сончевите зраци се многу ретки и не се доволни. Меѓутоа, и во останатите месеци луѓето не се доволно изложени на сонце поради тоа што се на работа, или, пак, поради штетното влијание на сончевите зраци. Најголем ризик од недостиг на витамин Д₃ имаат лица кои живеат во северните краишта, лица кои живеат во земји каде што има висока загаденост во воздухот и лица со потемен тен на кожата.

Недостигот на витамин Д₃ доведува до омекнување на коскеното ткиво, при што се јавува слабост во мускулите и намалена мускулна маса. Кај повозрасните лица недостигот на витамин Д доведува до појава на остепороза. Кај овие лица се јавува изнемоштеност, болки во коските и мускулите.



Неговата примена е особена важна за:

• Здрави коски – особено кај постари лица во превенција и третман на остеопороза;


• Го подобрува имунолошкиот систем, бидејќи го намалува ризикот од вирусни заболувања;


• Поздрава кожа;


• Здрави заби;


• Подобра концентрација и зголемена енергија.

Се препорачува кај:

• Недостиг на витамин Д;


• Лица со ризик од инфективни заболувања;


• Лица со остеопорза или остеопенија;


• Жени во менопауза;


• Лица со кардиоваскуларни заболувања и дијабетес;


• Лица со малигни заболувања.

Препорачаната дневна доза е 400 – 800 IU или 10 – 20 микрограми. Меѓутоа, доколку изложеноста на сонце е намалена или воопшто личноста не се изложува на сонце, тогаш препорачаната доза треба да е поголема – од 1000 до 4000 IU (25 –  100 микрограми).

За да може максимално да се искористи во организмот, најдобро е витаминот Д₃ да се зема со храна која е богата со масти (месо, јаткасти плодови и сл.).

Храна која е добро да се зема со витамин Д_3:

• лосос


• жолчка од јајце


• туна


• печурки


• сардина

За жал, секојдневно не можеме да јадеме риба и единствен извор на витаминот Д₃ се додатоците на исхрана.

За детално читање на овој текст, погледнете на 8 стр. во електронското издание на BETTY магазин (ЈАНУАРИ 2021).