Интересни информации за јогата

|







Ако размислувате дали да започнете со јога, тогаш вие сте на пат да ја донесете вистинската одлука, бидејќи јогата е една од најблагодатните дисциплини за која вашето тело и дух ќе ви бидат благодарни.

Главните придобивки од јогата се релаксација, подобар сон, подобра концентрација и целосно подобрување на менталното здравје. Доколку ви е потребна дополнителна мотивација за да почнете да вежбате јога, прочитајте ги следниве интересни информации.

Дали знаевте дека...

• Јогата помага при анксиозност и депресија. Живееме во стресно време кога нашето опкружување и темпото на животот влијаат на нашето ментално здравје. Секој од нас заслужува време во кое ќе може да им се посвети на своето тело и својот дух. Јогата е дисциплина која има позитивно влијание на негативните психички состојби, како што се анксиозноста и депресијата.


• Постои јога со смеење! Се верува дека насмевката има директно влијание врз оганизмот и дека вештачки провоцираната насмевка по извесно време делува како природна насмевка, којашто придонесува да се почувствуваат позитивните промени во вашето тело. Сесијата од 20-минутно смеење го подобрува дишењето, како основен начин нашето тело да се снабди со кислород, го смирува умот, помага за подобрување на концентрацијата и циркулацијата во телото, ја развива детската интелигенција и има позитивно влијание на дигестивниот и на лимфниот систем. Хасјајога – јогата со смеење, ја подобрува самодовербата и комуникацијата со луѓето околу вас. По извесно време на практикување ваков тип вежби, секојдневните работи коишто претходно ве нервирале, почнувате да ги гледате со други очи и сфаќате дека станува збор за минливи грижи. Дури постои тврдење дека кај повозрасната популација има подобрување и подмладување на кожата.


• Во светот постојат градови коишто ги отвораат вратите на своите музеи за љубителите на јогата. На пример, во Виена, Музејот „Албертина“ овозможува практикување јога во своите големи простории.


• Хенри Дејвид Торо, американски филозоф, активист и писател, бил еден од првите љубители на јогата од западниот свет. Во 1849 година тој испратил писмо до својот пријател Ралф Валдо Емерсон каде што ја споменал оваа дисциплина и се нарекол јогин.


• Јогата го намалува ризикот од срцеви заболувања. Истражувањата покажале дека има директна поврзаност помеѓу луѓето коишто практикуваат јога и здравјето на нивното срце. Јогата го намалува крвниот притисок, помага при дијабетес, па дури и помага при нападите на астма.


• Во Америка првиот центар за јога се отворил во далечната 1919 година. Центарот бил отворен на Менхетен од страна на Пиер Бернард.


• Клучниот фактор за успех во оваа дисциплина не се позите коишто ги правите за време на вежбањето, туку дишењето. Точно е дека повеќето вежби бараат еластичност и сила, но доколку не знаете да го контролирате дишењето и да дишете правилно, ништо нема да постигнете.

За детално читање на овој текст, погледнете на 26 стр. во електронското издание на BETTY магазин (ФЕВРУАРИ 2020).