КАКО ДО БЕЗГРИЖЕН ОДМОР СО БЕБЕ?

Првото нешто на кое треба да се обрне внимание е здравјето на бебето пред поаѓање. Препорачливо е да се направи кратка консултација со педијатар, особено ако се патува на подолга дестинација или во друг климатски регион. Ако бебето прима терапија или има некаква хронична состојба, важно е да се понесе доволна количина лекови за целиот период на одморот.
Патувањето, особено во лето, значи изложеност на високи температури и можност за дехидрација, осипи и промени во апетитот. Затоа, добро е да се внимава на хигиената, да се обезбеди доволно течности (како што е мајчиното млеко или адаптираното млеко), и да се носат соодветни креми за заштита на нежната бебешка кожа.
Важно е и да се остане смирен. Бебето ја чувствува енергијата на родителите – ако вие сте опуштени, и бебето полесно ќе се прилагоди на новата околина. Со мала доза претпазливост и многу љубов, вашиот одмор може да биде прекрасно семејно доживување, дури и со најмалото членче во куфер.
Не заборавајте и на условите за сместување – проверете дали собата има соодветна сенка, клима уред, можност за готвење или загревање млеко, и дали е прилагодена за мали деца. Понесете познати предмети од домот, како омилена цуцла, играчка или ќебенце, бидејќи тие ќе му овозможат чувство на сигурност и континуитет дури и во нова средина.
Конечно, бидете флексибилни. Одморот со бебе не мора да значи совршено организиран распоред. Понекогаш плановите ќе се сменат, бебето ќе посака да одмори кога сте токму тргнати на прошетка, или ќе има денови кога едноставно ќе сакате да останете во собата. И тоа е сосема во ред. Вистинскиот одмор се случува кога ќе прифатите да го следите темпото на вашето бебе – со трпение, грижа и љубов.
Многу родители се грижат и за храната при патување, особено ако бебето е веќе започнато со дохрана. Во тој случај, препорачувам да се понесат неколку проверени и безбедни оброци во мали садови, како и прибор за јадење што бебето го користи дома. Избегнувајте нови и непознати намирници додека сте на пат, бидејќи тоа може да предизвика непотребни реакции или тегоби. Храната треба да биде лесна, свежа и позната – тоа носи удобност и за бебето и за вас.
Исто така, не го потценувајте времето за одмор. Бебето може да биде пораздразливо поради промена на средината, нови луѓе и непознати звуци. Обидете се да задржите дел од рутината од дома – истиот ритуал пред спиење, истото ќебенце или музика. Тоа ќе му помогне на бебето да се чувствува сигурно, а вам ќе ви овозможи повеќе моменти на одмор и уживање. Патувањето со бебе е навистина убав начин да се зацврсти семејната врска и да се запишат првите заеднички авантури.
Запомнете, секое патување со бебе е ново искуство – можеби поразлично од одморите на кои сте навикнати, но исто толку вредно и полно со убави моменти. Со добра подготовка, со поддршка од вашиот педијатар и фармацевт, и со многу разбирање кон потребите на вашето бебе, ќе создадете спомени кои ќе ги носите со себе засекогаш. Безгрижен одмор не значи сè да биде совршено, туку вие да бидете присутни, подготвени и спокојни – токму она што му е најпотребно на едно бебе.