Секоја четврта жена во Македонија се соочува со карцином на града, болест која, за жал, води до мастектомија – хируршко отстранување на градата. Но, постојат напредни медицински решенија кои овозможуваат реконструкција на градата и враќање на физичкиот изглед, што значително го подобрува психолошкото здравје на пациентките.
Реконструкцијата на града се состои од хируршки зафат со цел да се обнови градата во форма и големина што ќе биде што поблиска на претходната. Оваа процедура може да се изведе веднаш пo отстранувањето на карциномот (таканаречена Immediate breast reconstruction) или по одредено време, по завршување на хемотерапија и радиотерапија, позната како одложена реконструкција.
Видови реконструкција
Реконструкција со импланти - Во првата фаза, имплантите се користат за реконструкција, а ако нема доволно ткиво, се поставува експандер кој постепено се полни за да се достигне саканиот волумен. Во втората фаза се заменува експандерот со имплант. Овој метод е популарен, но не овозможува обнова на осетливоста во градата.
Реконструкција со сопствено ткиво - Овој метод користи ткиво од телото на пациентката, најчесто од стомакот (ТРАМ или DIEP-резанка) или од грбот (Latissimus dorsi flap), за да се реконструира градата. Овие методи создаваат поестетски природен изглед, но се поинванзивни и бараат поголем оперативен напор.
ТРАМ-резанка вклучува преместување на стомачен мускул и ткиво за да се реконструира градата. Постојат две варијанти на оваа метода: педикуларна и слободна ТРАМ-резанка. Последната, иако нуди подобар естетски ефект, е посложена за изведување.
Latissimus dorsi flap вклучува преместување ткиво од горниот дел на грбот и често се комбинира со имплант за да се постигне посакуваната големина.
DIEP-резанка е најнапредниот метод, каде се користи само кожа и масно ткиво од стомакот, без да се зафаќа мускулатурата, што значително го намалува ризикот од болка и компликации по операцијата.
Реконструкција на мамила:
Во некои случаи, реконструкцијата на мамила (ареола и брадавица) се прави во втора или трета фаза од реконструкцијата. Ова е важен естетски чекор кој помага да се постигне природен и комплетен изглед на реконструираната града.
Компликации:
Иако реконструкцијата на града значително ги подобрува естетските резултати и психолошкото здравје, како и секој хируршки зафат, и таа носи ризици. Можни компликации вклучуваат инфекција, крварење, формирање сером (течност под реконструираната града), некроза на ткивото, формирање хернија и загуба на чувствителност.
Реконструкцијата на града не е само естетска процедура туку и важен дел од терапијата на пациентите со карцином на града. Со оваа интервенција, жените не само што го враќаат изгледот на своето тело, туку и нивното психолошко здравје и самодоверба, што е клучно за нивната целокупна благосостојба.
Реконструкцијата на града дава нова шанса за живот, обезбедувајќи им на пациентките чувство на исполнетост и контрола над своето тело. Одлуката за типот на реконструкција зависи од личните потреби на пациентката, возраста, стадиумот на болеста и резултатите од терапиите. На крај, најважно е што реконструкцијата им дава на жените нова надеж и живот без страв од нивната физичка трансформација.
Д-р Јасмина Ѓоргиевска
Спец. по Општа Хирургија,
Супспецијалист по Пластична и Реконструктивна Хирургија
.svg){kind=icon}