Секој септември носи нов почеток, но и нови предизвици за децата и родителите. По летото полно со слободно време, сладоледи и раздвижен распоред, враќањето во училишната рутина често е проследено со намален имунитет, настинки и зголемен стрес кај децата. За да се избегнат непријатности уште во првите недели од школската година, потребна е добра подготовка – и тука фармацевтот може да биде вашиот прв сојузник.
Подготовката треба да започне со зајакнување на имунитетот. Детскиот организам е чувствителен и брзо реагира на промени во навиките, температурата и контактот со други деца. Во фармацијата постојат безброј додатоци на исхрана, но не секој е соодветен за сите деца. Најчесто препорачани се витамин Ц и цинк, кои имаат директна улога во заштита од инфекции, како и витамин Д3 – кој е чест дефицит дури и по летниот период. Пробиотиците, пак, го зајакнуваат цревниот микробиом и помагаат имунитетот да биде стабилен. Важно е овие додатоци да се започнат најмалку две недели пред враќање во училиште, за да имаат доволно време да дејствуваат.
Покрај внатрешната поддршка, децата треба да се научат на хигиенски навики уште од првиот ден. Многу е корисно во ранчето да се стави мини хигиенски сет: мало шише со алкохолен дезинфекциски гел, влажни марамчиња и, по потреба, маска. Родителите треба да разговараат со децата кога и како да ги користат – на пример, пред јадење, после по тоалет или по кивање. Преку вакви практични навики, се намалува ризикот од ширење на инфекции уште во училницата.
И покрај сите мерки, децата ќе настинат – и тоа е сосема нормално. Затоа, препорачливо е дома да се има мала, добро снабдена аптека. Во неа треба да се најдат сирупи со парацетамол или ибупрофен, средства за намалување температура, изотонични спрееви за нос, прополис спреј или природни бомбони за грло, термометар и пробиотици. Важно е родителите да ја знаат точната доза според килограмите на детето и никогаш да не даваат антибиотик без препорака од лекар.
Храната игра огромна улога во здравјето на детето, но за жал, утрините често се пребрзи за здрав појадок. Доколку нема време, нека понесат енергетска плочка со житарици и овошје. Кога исхраната не е доволна, фармацевтот може да препорача квалитетен мултивитамински сируп или џвакачи без шеќер и вештачки бои. Омега-3 масните киселини, добиени од риба или ленено масло, имаат докажано дејство во подобрување на концентрацијата и меморијата кај децата, а магнезиумот помага при напнатост и подобар сон.
Но, не смееме да го заборавиме и емоционалниот аспект на враќањето во училиште. Некои деца се плашат од новиот учител, од одвојување од родителите или од социјализација. Во вакви случаи, фармацевтот може да препорача природни препарати кои содржат валеријана, пасифлора или магнезиум, кои дејствуваат смирувачки, без да го нарушат вниманието или расположението. Дополнително, искрен и топол разговор со детето секоја вечер може да направи чуда – важен е моментот кога се чувствува слушнато, поддржано и разбрано.
Со добра комуникација, соработка со фармацевтот и мала домашна подготовка, родителите можат да му овозможат на своето дете здрав, безбеден и среќен почеток на учебната година. Училиштето не мора да биде стресен период – напротив, со вистинскиот пристап, тоа може да биде време за растење, дружење и нови искуства. А кога детето е подготвено – и родителот е посмирен.
Здравјето на децата започнува дома, но се гради заедно – со поддршка од наставници, педијатри и фармацевти. Секој совет што го добивате од стручно лице е алатка со која го зајакнувате не само имунитетот, туку и самодовербата на вашето дете. Подгответе се со љубов, информирајте се од сигурни извори и верувајте во тоа дека секој добар почеток носи уште подобри резултати. Среќна и здрава учебна година!
Пишува
Соња Каревска
- Фармацевт
.svg){kind=icon}