Како правилно да се користат антибиотици

Зошто одговорното користење е клучно за вашето здравје и за здравјето на идните генерации.

Антибиотиците се едни од најголемите откритија во модерната медицина. Благодарение на нив, денес успешно лекуваме инфекции кои пред само неколку децении биле фатални. Но, нивната моќна ефикасност носи и голема одговорност. Неправилната и претерана употреба на антибиотици води до појава на резистентни бактерии – микроби кои повеќе не реагираат на лекот. Ова претставува глобална закана за јавното здравје.
Кога се користат антибиотици
Антибиотиците се ефикасни САМО против бактериски инфекции – како што се стрептококна ангина, одредени воспаленија на белите дробови, уринарни инфекции и сл.
Тие НЕ делуваат на вирусни инфекции, како настинка, грип, вирусен бронхитис или ковид. Земени без потреба, не само што нема да помогнат, туку можат да наштетат.

Како правилно да ги користиме
1. Секогаш по препорака од лекар – Никогаш на своја рака или по совет од друг.
2. Целосен третман – Дури и ако симптомите престанат, терапијата мора да се заврши до крајот, за да се уништат сите бактерии.
3. Во точно време и доза – Пропуштените дози го намалуваат ефектот и ја зголемуваат резистенцијата.
4. Не делете ги антибиотиците со други – Лекот што помогнал на еден пациент, може да биде погрешен за друг.
5. Не користете ги другите антибиотици од претходни терапии – Секоја инфекција бара соодветен антибиотик.

Последици од злоупотреба
- Бактериска резистенција* – бактерии што преживуваат стануваат поотпорни и потешко се лекуваат.
- Несакани ефекти – од гастроинтестинални проблеми до сериозни алергиски реакции.
- Нарушување на микробиомот – корисните бактерии во телото се уништуваат, што води до нови здравствени проблеми.

Што можеме да направиме
Како пациенти треба да бидеме одговорни и информирани. Како здравствени работници – да едуцираме и да препишуваме антибиотици само кога се навистина потребни. А како општество – да работиме на кампањи за подигање на свеста.

Антибиотиците спасуваат животи – но само ако ги користиме мудро.

 

Пишува
Д-р Тања Величковска