Маски за нега на лицето

[vc_column width="1/1"]

Мали тајни на славните жени

Милица Алексиќ

Елена Тројанска го поправала тенот со тоник од вода и оцет, кралицата Елизабета ставала на лицето белка, глумицата Грета Гарбо сирење и мед, а холивудската дива Рита Хејворт користела маска од овесно и пченкарно брашно за кадифен тен

Илјадници години наназад, жените за нега на своето лице, поправање на ситни недостатоци, свежа кожа и здрав тен, користеле маски од овошје, зеленчук, семки, житни растенија, мед, јајца и различни масла. Тој тренд се одржува сè до денес, зашто состојките како тогаш така и сега, биле на дофат на раце, во шпајзот и кујната, евтини, достапни и што е најважно, проверено ефикасни.

Во древна Грција жените користеле мед, маслиново масло и јаболков оцет, кое е силно антибактериско средство, а Елена Тројанска, поради чија фасцинантна убавина се водела Тројанската војна, наводно правела тоник за лице кој подмладува и ја освежува кожата, мешајќи млака вода и оцет во сооднос 1:4 и држејќи секои три до четири дена по пет минути натопено платно на лицето.

Пред 3 000 години, Римјанките ја прехранувале, чистеле и матирале кожата со маска од две лажици згмечен, свеж грашок помешан со млеко за смесата да стане кашеста, држејќи ја на лицето додека не се стврдне. И тогаш, како и денес, маската од лицето се вадела со топла, па со ладна вода, со кружни, масирачки движења. Римјанките, исто така, сакале да користат и бањи со пареа, па кожата пред нанесување на маската била темелно исчистена.

И прочуените владетелки имале свои мали тајни за нега на лицето. Англиската кралица Елизабета од династијата Тјудор имала проблематична кожа, па црвенилото на лицето, акните и воспалението успешно ги ублажувала со маска од белки. Состојките од кујната и шпајзот ги користеле и филмските диви, па глумицата Рита Хејворт за својата негувана, свежа, мат, кадифена кожа можела да ѝ заблагодари на маската од овесна каша, пченично брашно и белка, која ја држела на лицето 20 минути. Преубавата Грета Гарбо мешала три лажици младо сирење со лажица мед и смесата ја нанесувала на чувствителните делови околу очите и усните, бидејќи оваа комбинација може да се употребува и за чувствителна кожа, која ја освежува и храни. После 20 минути, Грета Гарбо смесата од лицето нежно ја вадела со неварено млеко.

КИСЕЛО ТЕСТО: Ако славните жени од минатото умееле да се негуваат со свежи маски од природни состојки, можете и вие! Искористете ги намирниците кои ги имате дома. Ако правите штрудла од кисело тесто, одвојте малку тесто, нанесете го на лицето и држете го половина час, па отстранете го со топла вода. Маската од кисело тесто ја чисти и ја затегнува кожата и многу е популарна во Скандинавија.

ПИРЕ ОД КОМПИРИ: Маската се прави од топол, варен, изгмечен компир, помешан со жолчка и малку млеко. Кога ќе се нанесе на лицето, треба да се покрие со крпа и по 20 минути да се исплакне со вода. Оваа маска ја освежува уморната кожа, ја прави еластична и многу е популарна во САД.

КИСЕЛА ЗЕЛКА: На лицето треба да се стават листови од сочна, кисела зелка, па после 15 минути да се исплакне со ладна вода. Киселата зелка ја храни и освежува кожата и е популарна кај парижанките.

КАША ОД ЛЕНЕНО СЕМЕ: Благотворна е за чувствителна и сува кожа кога е ладно времето, а се прави така што се варат и ладат две лажици ленено семе. По 20 минути се плакне со млака вода. Германките ја сметаат за одлично средство против брчки, бидејќи кожата ја прави мазна.