Најдобри извори на витамини во зимските денови

[vc_column width="1/1"]

За јакнење на имунитетот

Ако секој ден консумирате свежо овошје и зеленчук подготвено во блендер, јадете витамински салати, риба и бело месо, прилог од зеленчук готвен на пареа и зачинет со маслиново масло, а за ужинка јаткасти плодови, печени јаболка и јогурт, ќе бидете свежи и во добра мера заштитени од зимски вирози

Во зимските месеци намален внес на витамини може да предизвика замор, недостиг на енергија, пад на имунитетот и подложност на вирусни и бактериски заболувања, па важно е во ладните денови да се консумираат продукти богати со витамини и минерали кои го штитат организмот од болести.

Млеко, сардини, туна, лосос, жолчка се добар извор на витамин Д, кој му е неопходен на нашиот организам и во тмурното време. Во зимските денови добар избор се и додатоците во исхраната кои го содржат „витаминот на сонцето“.

Житни растенија од цело зрно, јаткасти плодови, грав и други мешунки, месо, банани, се добар извор на витамин Б6, кој игра важна улога во производството на антитела кои се борат против болести. Недостиг од овој витамин предизвикува анемија, јадеж и исип, отечен јазик и суви усни.

Портокали, батат, т.е. „благ компир“, тиква и нејзините семки, морков, лук, полномасни млечни производи, рибино масло, зеленчук со темнозелени листови  се добар извор на витамин А, кој ни е неопходен за подобрување на имунитетот, за видот, растот, развојот на коските, клетките и ткивата.

Зелка, пиперки, карфиол, лимон, јаболка, киви се добар извор на витамин Ц, кој е чувствителен на светлина, воздух и температура, па се препорачува кратко готвење на зеленчукот на пареа, зашто со готвење од 20 минути се губи повеќе од половина од овој драгоцен витамин.

Предлог мени: За појадок овесна каша, чаша јогурт, леб од цело зрно, варено јајце, младо сирење, чај од билки. За ручек чорба од тиква, богата со витамин А, или пилешка супа, печена сина риба и блитва со маслиново масло. За вечера пилешко без кожа и динстан морков. Помеѓу оброците свежо овошје и зеленчук изматени во блендер (спанаќ, киви, банана), односно овошна салата без додаток на шеќер, печено јаболко со додаток на  сечкани јаткасти плодови. Ако се чувствувате уморно и исцрпено, направете витаминска салата од свежо рендано цвекло, јаболко и целер, со додаток на лимонов сок, маслиново масло или масло од семки од тиква.

Суперпродукти за зима

1. Портокал (витамин А, Ц, фолна киселина, минерали калциум, калиум)


2. Житни растенија од цело зрно (витамини Б1, Б2, Б6, Д, минерали калиум, магнезиум)


3. Батат или „благ компир“ (витамини А, Ц, Б5, Б6, манган)


4. Грав (железо, магнезиум, витамини Б-комплекс)


5. Црно чоколадо (антиоксиданти, магнезиум, калциум, железо, цинк, манган)


6. Тиква (витамини А, Ц и Е, железо, манган, калциум, цинк)


7. Јаткасти плодови (калциум, железо, витамин Е, цинк, магнезиум)


8. Лук (минерали, калциум, железо, витамини А, Ц и група Б)


9. Ѓумбир (калиум, магнезиум, бакар, манган и витамин Б6)


10. Јаболка (витамини Б и Ц, магнезиум)