Сам свој шапкар

[vc_column width="1/1"]Катарина Вијатов

За среќен живот се потребни грст ориз и шешир од слама, вели една стара кинеска поговорка

Со причина дизајнерите ги обожуваат шеширите, затоа што тие одамна ја надминаа својата основна фунција да ја штитат главата од сонце и се претворија во интересен моден детаљ, кој ги трпи сите трансформации и креативни зафати. Најнеобични, екстравагантни облици не се гледаат само на ревиите на висока мода, туку и на хиподромите ширум светот, каде што дамите во публиката се натпреваруваат чиј шешир ќе привлече најголемо внимание. Вистински подвижни градини, кафези за птици и необични скулптури ги разубавуваат главите и на венчавките, особено кралските, забавувајќи ги набљудувачите со своите ексцентрични облици.

Но, не мора да бидете член на кралско семејство за на глава да носите уникатен шешир со необични детали и украси. Забавен и весел модел можете да направите и во домашна режија, по систем „сам свој шапкар“. Од материјали потребни ви се: едноставен шешир од слама, може и стар и оштетен, цвеќе, ленти, пулејки, марами и сè што ќе ви падне на памет. Ножичките, хефталките, иглата и конецот сето тоа што сте го замислиле ќе го спојат во визуелно интересна целина.

Покрај вештачкото, жолто цвеќе, во една верзија шеширот го украсивме и со свежо цвеќе, лале, магнолија и глуварче. Во друга верзија шеширот прво го прекривме со тил и на тој начин му дадовме воздушест, мек облик, на кој додадовме детали, нацртани птици и машнички. Со разнобојни ленти од свила едноставно не можете да згрешите, а добро е и што можат да се менуваат. Истото важи и за тенка марама, со која шеширот ќе се „облече“ и трансформира во нешто сосема ново. Својата креација секогаш можете да ја усогласите со летен фустан, или костим за капење, а ако мислите дека сте претерале со украсувањето и немате храброст да го ставите на глава, шеширот секогаш можете да го закачите на ѕид, каде што ќе ве развеселува секогаш кога ќе го погледнете.