Украсете го летото

Маици и перлиКатарина Вијатов

Понекогаш малку фантазија, трпение и желба се доволни да креираме работи за кои сите ќе прашаат каде сме ги купиле, а, всушност, само малку сме ги доработиле старите алишта

Модерна и интересна маица со малку добра волја може да се најде во вашиот орман  уште денес. Повеќето од нас имаат маица која не е облечена со месеци, а можеби дури и години. Таа е секогаш тука, на полица со маиците кои редовно ги носиме, но некако постојано ја заобиколуваме и таа никогаш не доаѓа на ред за носење. Имаме прекрасен и едноставен предлог како да ја освежите вашата маица и да добиете потполно ново парче облека, кое за промена веќе нема да биде на полицата.

Сè што ви е потребно за изработка на маица со перли е: игла, конец и перли. Украсете ја вашата маица така што на неа ќе сошиете перли во разни бои и облици. Ние користевме сини, виолетови и бели перли, и еднобојната маица во крем-боја ја  претворивме во ефектна уникатна маица. Наизменично околу отворот за вратот   зашивавме сини и виолетови перли, а потоа белите ги сошивме во облик на цвет. На перлите има мали дупченца низ кои го провлекувате конецот и го зашивате за маицата, наша препорака е да користите конец во боја на маицата за делот од конецот што се гледа да биде помалку видлив. Доколку ви се допадна нашата идеја, вашата маица можете да ја украсите и со нитни, крупни перли или ситни перли, еднобојни или шарени, кои можете да ги сошиете по ракавите, околу вратот или на средина на маицата.