ДОЛГОТРАЈНОТО СЕДЕЊЕ Е ОПАСНО

Вежби кои помагаат

 

Секојдневното долготрајно седење има бројни лоши последици на вкупната здравствена состојба на нашиот организам. Поради тоа секој вид активности е добредојден во борбата за подобро држење на телото.

 

Автор Марко Симиќ

 

Модерниот начин на живот му донесе на човештвото многу погодности, но и една голема скриена опасност ̶ седењето. По илјада години еволуција во текот на кои човечкиот организам се приспособувал на постојано движење со цел опстанок, во само неколку децении дојдовме до ситуација во која во седење поминуваме најмалку осум часа дневно, а понекогаш е речиси целокупното време во кое сме будни.

 

Како резултат на неактивноста доаѓа до бројни пореметувања во метаболизмот, тонусот на мускулите и останати битни здравствени параметри. Ослабените грбни и стомачни мускули не даваат доволно потпора на ’рбетниот столб, а покрај лошото телесно држење ова има за последица и хронични болки во грбот, вратот и рамењата. Наместо да земаме аналгетици, можеби би можеле да вложиме малку труд и во својата секојдневна рутина да воведеме неколку вежби кои сигурно ќе ни годат.

 

Движењето како основа на здравјето

Симнете се од превозот една станица понапред па остатокот од патот поминете го пеш. Доколку на работа одите со кола, обидете се барем во набавка до околните продавници да одите пеш. Качување и симнување по скали претставува одлична вежба. Наместо после вечера да ја заземете својата омилена позиција на креветот, облечете патики и прошетајте барем 20 минути (почнете со прошетка од пет минути, па секоја вечер додавајте по една минута додека не стигнете до дваесет).

 

Стомачни за програмери

Многу луѓе во текот на последниве години своите канцелариски столови ги заменија со големи фитнес топки, што позитивно влијае на нивната мускулатура. Ако, сепак, останувате во својот стол, тогаш направете го следново: исправете го грбот и подигнете го едното стапало пет сантиметри од тлото. Задржете го во таа положба пет секунди, потоа повторете го истото и со другото стапало. Првиот ден направете по три подигања со секоја нога, потоа воведувајте секој ден по едно дополнително подигање додека не стигнете до десет. Повторете ја вежбата барем три пати дневно и наскоро ќе ја повратите контролата над одамна заборавените стомачни мускули.

 

Размрдување на раменскиот појас

Опуштете ги рацете покрај телото и кружете со рамењата десет пати нанапред, потоа десет пати наназад. Ова би требало да го правите на секој половина час. Кога ќе завршите со кружење, подигнете ги испружените раце бочно со лесно движење над главата додека шаките не се спојат, со вдишување воздух. Потоа со издишување спуштете ги рацете покрај телото по истиот пат. Ова направете го пет пати. Ќе се чувствувате поопуштено и поодморно.

 

Кружење со колковите

За оваа вежба, сепак, ќе мора да станете од стол. Напуштањето на седечката положба инаку е препорачливо на секој половина час. Станете покрај своето работно место, исправете се, ставете ги рацете на колкови и кружете десет пати во насока на стрелките на часовникот. Потоа тоа повторете го во спротивна насока. Оние кои ви се смеат веројатно наскоро ќе ви се придружат.

 

Активирање на нозете

Во пауза помеѓу две испраќања на е-пошта подигнете ги колената во седечка положба така што стапалата ќе останат потпрени само на врвовите на прстите. Потоа спуштете го целото стапало на под. Ова можете да го правите и во ритамот на музиката која ја слушате на работа. Друга варијанта од оваа вежба која изискува повеќе се изведува стоејќи додека чекате превоз, стоите во ред или каде било на друго место. Исправете се на ножните прсти и потоа потпрете се на целите стапала. Освен што ги јакнат мускулите на листовите, овие движења ги размрдуваат и стапалата, колената, колковите и бутните мускули.