ЕДНОСТАВЕН ОДГОВОР НА ВАЖНО ПРАШАЊЕ

Како да слабеете без гладување?

 

ЛИД Во денештото општество со растечки број на дебели луѓе сè почесто се поставува прашањето како да се слабее без гладување.

 

Автор д-р Жарко Поповиќ

 

Одговорот на прашањето од насловот е едноставен: да се постигне баланс, поточно дефицит помеѓу внесот и потрошувачката на енергија. Иако одговорот е едноставен, не е лесно да се постигне резултат. Прво треба да се совлада мрзеливоста, која нè спречува да се придвижиме. Многумина по само две-три недели се откажуваат од диета. Поради тоа многу е важно психички да се подготвите и да истраете во напорите да се постигне саканиот резултат.

 

Како да почнете?

Пред сè, треба реално да се согледа степенот на дебелина. За тоа да се направи треба да се пресмета износот на телесна маса (BMI). Постојат повеќе сајтови на кои можете да го одредите својот BMI. Потребно е да ја внесете својата висина, тежина и ќе добиете соодветен резултат.

За почеток треба да си поставите реални цели. Повеќето би сакале да изгубат 10 кг за две недели, но тоа покрај тоа што не е реално, не би било ни здраво. Да се изгуби 4-5 кг месечно е доволно, а ако тежината се губи со умерена брзина, кожата има време да се врати на состојбата пред дебелината.

Што да се избегнува?

Сите знаеме дека внесување на поголеми количини јаглехидрати и масти доведува до дебелина, но малку мислиме за тоа дека и алкохолот кој го пиеме ослободува количина енергија која на крај се претвора во масти и се депонира. Покрај алкохол, треба да се избегнува и преработена храна. Во индустриските преработки (виршли, салами, паштети...) се наоѓа голема количина конзерванси, вештачки бои, стабилизатори и засилувачи на вкус. Тие материи го пореметуваат нормалното функционирање на жлездите во нашиот организам кои ги контролираат бројните процеси на метаболизмот. Последица на тоа е пореметен хормонски баланс кој доведува до дебелеење.

 

Во нашата земја најголем виновник за дебелината е белото брашно кое се користи во огромни количини за сите видови печива. Со мешање на маргарин, брашно и шеќер се добива исклучително примамлива и вкусна храна, која е исклучително нездрава. Дури во некои продавници можете да купите и печива од интегрално брашно, кое тоа воопшто не е, туку се работи за мешавина на интегрално и бело брашно, или во полоши случаи, за обоено бело брашно! Поради тоа најдобро е леб да подготвувате дома или да го купувате кај проверени производители.

 

Хидратација!

За правилно функционирање на нашиот организам неопходна е водата. Водата е неопходна и за разладување, па е потребно дополнително да се зголеми внесот на вода за време на големите горештини или физички напори. Потребно е да се пие барем 2 литра вода секој ден, а пожелно е и повеќе.

 

Редовно вежбање – повеќекратна корист

Физичката активност е подеднакво важна како и здравата исхрана. Неопходно е барем 30 минути секојдневна физичка активност, како што се брзо одење, возење велосипед или ролери, трчање. За многу од овие активности постојат справи за тренирање кои ги имитираат во домашни услови. Се разбира дека е поздраво и поубаво да се занимавате со спортски активности во природа, но и користењето на вакви справи е поеднакво ефикасно кога е во прашање забрзувањето на метаболизмот кое е неопходно во процесот на слабеење. Зголемената физичка активност и редовното занимавање со спорт имаат повеќекратни позитивни ефекти. Регулирањето на телесната, и зголемувањето на мускулната маса, доведува до поправање на општата состојба на организмот и квалитетот на живот. Кожата се затегнува и добива помлад и посвеж изглед. Со вежбање се намалува ризикот од многу хронични и тешки болести, како што се хипертензија, дијабетес, хиперлипидемија, инфаркт, мозочен удар, малигни болести...

Физичката активност кај постари лица и лица со кардиоваскуларни болести во почеток треба да биде умерена, без поголеми напори, со постепено повеќемесечно зголемување на интензитетот. Кај пациенти со потешки кардиоваскуларни пореметувања е потребна редовна лекарска контрола.

 

Дополнителни совети

Постојат и различни физикални третмани кои може да влијаат на намалување на масните наслаги. Се работи за терапија со радиобранови, ултразвук и масажа, кои доведуваат до забрзување на локалниот метаболизам и деградација на масните клетки.

Оброците би требало да бидат изедначени, со растојание од барем 4 часа. Научниците установиле дека на сигналот за ситост од нашиот систем за варење му се потребни од 15 до 20 минути за да дојде до мозокот. Тоа значи дека помалку ќе изедеме ако јадеме побавно.

 

Бројни нутриционисти со правење на програма за диети и нивни правила со децении придонесуваа за подобрување на здравјето на луѓето, влијаејќи на нивната свест за потребата исхрана да се поправи. Правилата на Хроно исхрана, Аткинсонова диета, цитрусни и други диети со детаљни упатства на менија можете да ги пронајдете на Интернет. Секој треба да ја избере онаа која најмногу одговара на неговата возраст, телесна маса и општа состојба на организмот. Секако, за изборот на идеална диета мора да се консултирате со лекар или нутриционист.

 

Опасност од скриените шеќери!

Многу производи кои секојдневно ги внесуваме во својот организам содржат скриени шеќери. Од исхраната треба да се изостават газираните пијалаци, соковите, овошните јогурти. Покрај тоа, од исхраната треба да се исфрлат и некои други работи за кои никогаш не би помислиле дека дебелеат. Мастиките, на пример, имаат во себе аспартам, кој се користи како засладувач. Тоа има силно дејство на лачењето на панкреасот и ослободувањето инсулин, со што доведува до дебелеење.

 

Кафето е дозволено

Овој секојдневен стимуланс и освежувач на нашиот мозок без кој многумина од нас не може да го започнат денот, треба да се зема после појадок, бидејќи кофеинот ги депонира во ткивата шеќерите кои се наоѓаат во крвта и го засилува гладот. Шеќерот во кафето треба постепено да се намалува до целосно укинување. Постојат и бројни вештачки засилувачи, но многу е поздраво да се навикнете на кафе без шеќер.