Исхрана во студените денови

Намирници кои ја подигаат енергијатаАна Николиќ

 

Ладното време бара нешто поинаков вид на исхрана, но тоа не значи дека во зима треба да консумираме тешки јадења и да се храниме обилно, туку значи дека ни е потребен внес на енергетски појака храна, богата со витамини и минерали. Кога е студено, врнежливо, има ветер и снег, повеќе престојуваме во затворени простории, каде сме поподложни на вируси и бактерии, па добро е што почесто на трпезата да има намирници кои го подигаат имунитетот и енергијата и ни помагаат да бидеме здрави.

СУПИ: Зиме е препорачливо да се консумираат топли супи секој ден бидејќи греат, преполни се со нутриенти кои ја враќаат енергијата, а се благотворни за настинки и нè штитат од вируси. Пилешката супа со зеленчук (морков, целер, кромид и лук) е исклучително квалитетен оброк за сите возрасти, па треба почесто да ја има на трпезата. Многу се квалитетни и различни крем супи од зеленчук, на пример, од тиква, спанаќ, домати, а можете да направите и микс од зеленчук од намирници кои ги имате во фрижидер.

ПЕЧЕН КРОМИД: Кромидот можете да го печете на повеќе начини, на тркалца, цел и излупен, но и во лушпа така што ќе ги исечете врвовите, кромидот ќе ги наредите во плех за печење и ќе го ставите во рерна на 180 степени (околу 25 минути). Вака испечениот кромид е многу вкусен и здрав антиоксидант, а може да служи како прилог со печено месо и риба. Можете да го зачините со ситно сечкан магдонос, чили (ако сакате луто) и да додадете неколку капки маслиново масло.

КОМПИР ВО ЛУШПА: Овој старински начин на подготвување компир, така што ќе го измиете па го печете во рерна замотан во фолија, веќе при подготовката создава чувство на топлина и зголемена енергија, бидејќи се шири романтичен мирис. Одличен прилог е со динстан зеленчук, месо или риба.

ПРОКЕЉ И ЗЕЛКА: Прокељот и зелката се богати со витамини Ц, А и од Б-групата, со магнезиум и калциум. Исклучително се корисни намирници за подигање на имунитетот и превенција на настинка и грип. Дејствуваат антисептички на дишните органи и го олеснуваат кашлањето, па треба да ги има на трпезата барем еднаш во неделата.

ЦИТРУСИ: Освен што освежуваат, портокалот, лимонот, мандарината и грејпфрутот се богат извор на витамини, имаат антивирусни и антиоксидативни својства, па може да го скратат времето на настинка и да ги намалат симптомите.

ЧАЕВИ: Вкусни билни чаеви, од шипка, хибискус, нане и други, се незаменлив напиток во студените денови. Можете да ги зачините со цимет и мед и да ги пиете топли, во текот на денот.

ЈАБОЛКО И МЕД: Ова се две исклучителни намирници, кои може да ги комбинирате зеаедно (на пример, изрендано јаболко да го зачините со мед). Исто можете да направите и со јаболка печени во рерна, со додаток на ореви или бадеми.

Во студените денови консумирајте и лук, целер, власец, јаткасти плодови, сушено овошје, свежи овошни сокови, зелен и црвен зеленчук, интегрални житни растенија, млечни производи, риба и пилешко месо и не заборавајте да го хидрирате организмот со литар до две литри вода.