СО БРЗО ОДЕЊЕ ДО ЗДРАВЈЕ

Катарина Вијатов

Одењето е аеробна активност и најприроден облик на рекреација, која многу поволно дејствува на целосната здравствена состојба доколку редовно се практикува (три до пет пати неделно, минимум 40 минути дневно, и тоа надвор, на воздух). Просечната брзина на одењето по не толку напорен терен е околу пет километри на час, а при практикување на брзо одење – околу седум километри на час. Меѓутоа, тоа се релативни вредности, бидејќи ритамот и темпото зависат од многу фактори, како што се возраста, вишокот килограми, здравствената состојба, кондицијата, но и теренот по кој се движиме. Она што е важно е да се совлада техниката на брзо одење, како и практикувањето на оваа активност да станува навика која нема да ја пропуштаме.

Техника на брзо одење: Исправното брзо одење за рекреативци, всушност, е смена на брзо и нормално одење. Грбот треба да е исправен, рамениците во позиција наназад, додека рацете, спуштени до телото и свиткани во лактите, треба да го следат ритамот на нозете. Почнувате со пет минути „обично“ одење, без застанување, па потоа три минути одете брзо, потоа продолжете со пет минути одмерено одење, па пет минути забрзано, па три минути нормално, па десет минути забрзано, па забавете на три минути. Овој распоред на нормално и брзо одење е само пример – некој без кондиција и со вишок килограми ќе оди забрзано можеби само минута без да изгуби здив. Затоа е многу важно да се слуша своето тело и да се забави кога ќе почувствувате „дека губите воздух“, а во тој момент не треба да застанете туку да продолжите со побавно темпо. Со време ќе ја зголемите должината на одење и интервалите на брзо одење. Пред и после активностите направете неколку вежби за загревање и истегнување.

Ритам: При брзото одење многу е важна смената на нормално и брзо одење, според вашата мера и кондиција. Веќе после две недели ќе почувствувате напредок, а интервалите на брзо одење ќе се зголемат. Важно е да го пронајдете својот ритам и да не се натпреварувате со други туку сами со себе. Ако усвоите навика на редовно брзо одење, три до пет пати неделно, за еден месец ќе почувствувате прилив на енергија и ќе умеете да го процените својот вистински ритам.

Облека и обувки: Облеката треба да биде удобна и слоевита (да можете да облечете или соблечете јакна, дуксер), а на нозете патики. Вода и сите ситници кои обично ги носите кога одите надвор ставете ги во мал ранец  на грб. Така ќе имате целосна слобода на движењата.

Бенефит: Истражувањата кои се направени на повеќе од 11000 лица на возраст помеѓу 40 и 60 години покажале дека рекреативното занимавање со брзо одење го продолжува животниот век и го подобрува квалитетот на живот. Брзото одење е корисна превенција против мозочен удар, го јакне имунитетот и срцето, ги штити крвните садови, го зголемува бројот на леукоцитите и нивната активност, и е сојузник против несоница. Исто така, брзото одење прави да се чувствуваме полетно, опуштено и расположено, а и вишокот килограми се топи. Нема ни опасност од повреди, затоа што не ги оптоварува зглобовите како трчањето, а ризикот од воспаление на мускулите е мал.