Filloni ditën me një filxhan çaj

Ivana Dimishkova
Doktoreshë e mjekësisë dentare

|



Pjesa më e bukur e ditës është mëngjesi. Natyra zgjohet në mëngjes dhe fillon jetën, prandaj mëngjesi duhet të fillojë me diçka të bukur, aromatike, diçka që do t'ju zgjojë dhe do t'ju mbushë me energjinë e nevojshme për të gjithë ditën. Pra, nëse jeni në mëdyshje çdo mëngjes nëse të pini çaj apo kafe për t'u kthjellur, pa dyshim zgjidhni çajin dhe shijoni përfitimet e tij.

Çaji jo vetëm që ndihmon për të përballuar më shpejt sëmundjet ose ftohjet, por gjithashtu ndihmon në ruajtjen e shëndetit tonë mendor. Lloje të çajit ka shumë, ashtu siç ka edhe shumë arsye pse është mirë të pini çaj çdo ditë.

Çaji i gjelbër – ky çaj është një nga çajrat më pak të përpunuar, i cili përmban një sasi të madhe të antioksidantëve, të cilët mbrojnë lëkurën dhe imunitetin, si dhe kanë një efekt pozitiv në stimulimin e metabolizmit, uljen e kolesterolit dhe humbjen e peshës.

Çaji i xhenxhefilit – ky çaj është i mrekullueshëm për tretjen, metabolizmin dhe uljen e mbipeshës. Pijeni para ngrënies për të përmirësuar tretjen dhe për të zvogëluar oreksin. Gjithashtu shtendos muskujt e lodhur dhe e ndihmon trupin të përthithë lëndët ushqyese.

Çaji i nenexhikut – ky çaj ka një efekt terapeutik, dhe gjithashtu ka përbërës anti-inflamator që ndihmojnë në qetësimin e dhimbjeve të stomakut dhe simptomave të PMS-së dhe zvogëlojnë oreksin.

Çaji i barit të bletëve - është i përsosur për para gjumit për të ulur stresin. Ka një efekt qetësues dhe gjithashtu mund të ndihmojë me problemet e frymëmarrjes dhe ftohjet. Është gjithashtu i mirë për zbutjen e dhimbjes së dhëmbëve dhe dhimbjes së kokës dhe për përmirësimin e funksionit të sistemit tretës.

Çaji i kamomilit – përdoret që nga koha e gjysheve tona dhe ndihmon në problemet me gjumin dhe dhimbjet e stomakut, si dhe mbështet tretjen. Nëse fëmija ka stomak të trazuar për shkak të ngrënies së ëmbëlsirave, çaji i kamomilit është zgjidhja e parë për të hequr shqetësimin. Përveç kësaj, kamomili ndihmon në qetësimin e sistemit nervor dhe ka veti anti-inflamatore, veti që rekomandohen për fëmijët të cilëve janë duke u dalë dhëmbët dhe fëmijët që janë hiperaktivë ose me stres. Rekomandohet të pihet para vaktit.

Çaji i shtogut – është zgjedhja e parë në rastet e gripit dhe ftohjes. Ndihmon me kollën dhe shkakton djersitje, gjë që ul temperaturën. Përveç kësaj, djersitja ndihmon në largimin e toksinave.

Çaji i kantarionit – njihet për vetitë e tij antivirale dhe antibakteriale. U jepet fëmijëve që kanë probleme me urinimin gjatë natës.

Çaji i sherbelës – është i rëndësishëm për shkak të vetive antibakteriale. Sherbela është diuretik, ndaj ky çaj është veçanërisht i rëndësishëm për infeksionet e traktit urinar. Sherbela gjithashtu ka një efekt qetësues, veçanërisht në sistemin tretës.

Çaji i hithrës – përmban një sasi të konsiderueshme hekuri, prandaj është i dobishëm në luftën kundër anemisë. Ndihmon edhe për sëmundjet e frymëmarrjes, veçanërisht për kollën, duke zvogëluar sekretimin në mushkëri. Përmirëson pamjen e lëkurës dhe stimulon rritjen e flokëve.

Në të ardhmen, mos prisni të ftoheni ose të sëmureni për të pirë çaj, por le të bëhet pjesë e shprehive tuaja të shëndetshme.

Për lexim të hollësishëm të këtij teksti, shihni f.30-31 të botimit elektronik të revistës BETTY (SHKURT 2022).