Вежби за брзо обликување на телото

Предраг Грујиќ

Иако објективно е невозможно преку ноќ да се преобликува телото, да се намали стомакот, да се затегне задникот, а нозете да станат повитки и помускулести, сепак, некои вежби и активности побргу даваат резултати, што ја зголемува мотивацијата да се продолжи со вежбање. Комбинирано секојдневно вежбање ќе направи опуштените мускули релативно бргу да се затегнат, а отфрлањето на лошите навики во исхраната ќе резултира со намалување на масните наслаги.

Кардио вежби: Скокањето и прескокнувањето на некои препреки ги развиваат силата и брзината, согоруваат калории и ги обликуваат мускулите на целото тело. Затоа скокајте во место така што во исто време ќе ги ширите и рацете и нозете, односно ќе ги собирате рацете и нозете при секој доскок. Оваа вежба, позната како  „Jumping Jack“, е една од најпопуларните , кога станува збор за кардио тренинг. Правете ја една до три минути. „Cross Jack“ (вкрстен Џек) е варијација на претходната вежба во која се вкрстуваат нозете и рацете при секој скок. Правете ја, исто така, минута до три минути. За една од најдобрите кардио важби се смета трчање во место со високо подигнување на колената и рацете свиткани во лактите кои го следат ритамот. Правете ја еднакво долго како и претходните две вежби.

Одење: Одете секој ден 40 минути, без застанување, во ритам кој вам најмногу ви одговара, така што нема да останете без здив. Рацете треба да се слободни и да го следат ритамот на одењето. Секојдневното одење го забрзува метаболизмот и помага во регулирање на телесната тежина, обликување на мускулите и развивање кондиција.

Тегови и повторувања на вежби: Ефикасно вежбање за брзо обликување на телото подразбира употреба на тегови и повторувања на вежби. Може да се почне со тегови од половина килограм или килограм. Вежбите треба да се повторуваат во серии од шест или дванаесет пати, со тоа што секогаш е подобро да се направат шест правилно изведени вежби, отколку двојно неправилно направени.

Вежби за рамнотежа: Стоење на една нога и чучњеви ја подобруваат рамнотежата, го намалуваат ризикот од повреди, но и ги активираат мускулите на нозете. Поради тоа треба да се повторуваат секој ден три пати во десет или дванаесет серии, со паузи помеѓу.

Вежби за правилно држење: Со правилно држење на телото ќе изгледате повисоки и повитки, па трудете се во секојдневните активности да го држите грбот исправено, рамената опуштени и малку зафрлени наназад. Секој ден правете ги вежбите, така што ќе легнете на грб, со колкови притиснати за подот, со затегнат стомак, без истегнување во половината. Наизменично подигнете ја спротивната рака и нога и повторувајте ја оваа вежба во три серии по дванаесет пати.

Вежби за стомак и половина: Легнете на грб, со свиткани колена, со стапала на подот. Рацете со испреплетени прсти држете ги на тилот. Користејќи ги стомачните мускули подигнете го трупот кон колената, застанете неколку секунди, па полека вратете се во првобитната положба. Вежбата повторете ја дванаесет пати. Направете кратка пауза, па лежејќи на грб, со испружени нозе, држејќи ги рацете покрај телото, со дланки свртени кон  подот, подигнете ги нозете полека (45 степени од подот). Спуштете ги нозете, па без задржување на подот повторно подигнете ги. Вежбата повторете ја дванаесет пати.