ВЕЖБИ ЗА ЗДРАВ ’РБЕТ

[vc_column width="1/1"]Игор Тица

Седење во училиште, на работа, пред ТВ-екрани и компјутер, во градски превоз, дури и на излет, предизвикува болки во грбот и проблеми со ’рбетот. Од современиот начин на живот не можеме да избегаме, но можеме да мислиме на превентивата и да ги зајакнеме мускулите кои го поддржуваат „столбот на телото“. Физичката активност е формула за здравје на нашиот апарат за движење. Тегобите може да се надминат со пливање, шетање, аквабик, утринско истегнување, но и ако мислиме на држењето на телото, а долготрајното седење го прекинуваме со мали паузи.

Здравјето на ’рбетот е во директна релација со силата на грбните и стомачните мускули, кои го носат поголемиот дел од тежината на горната половина на телото. Ако мускулатурата на грбот и на стомакот ни е слаба, а имаме и вишок килограми, зголеменото оптоварување неповолно влијае на ’рбетот и тогаш почнува да боли. Поради тоа, зајакнете ги со вежбање овие две групи на мускули, така ќе ја намалите опасноста да ве боли грбот. За замор во грбот од долготрајно седење, помагаат овие шест вежби:

ВЕЖБА 1: Легнете на стомак, а рацете испружете ги над главата, па истовремено од подлогата подигајте го горниот дел од трупот со испружени раце и нозе.
ВЕЖБА 2: Иста е како вежба број 1, но држете во рацете некоја мала топка.
ВЕЖБА 3: Легнете на стомак како во вежбите 1 и 2, но рацете ставете ги на тилот и испреплетете ги прстите, па истовремено подигнете ги нозете и горниот дел од трупот.
ВЕЖБА 4: Иста како вежба број 3, но рацете ставете ги на грбот и соберете ги на задникот.
ВЕЖБА 5: Легнете на стомак, рацете испружете ги покрај телото, со дланките на подлогата, со лесно темпо подигнете го горниот дел од трупот и нозете во исто време.
ВЕЖБА 6: Легнете на грб, рацете испружете ги со дланките на подлогата. Споените нозе свиткајте ги во колената и подигајте ги кон себе, целиот труп да ви биде на подлогата, а потколениците и натколениците ќе прават агол од 90 степени. Останете во таа положба некое време, потоа нозете спуштајте ги на лева, па на десна страна, следејќи го движењето со телото.

Секоја вежба правете ја по една минута, онолку колку што можете, па постепено зголемувајте секоја вежба да ја правите по три минути. Само 20 минути вежбање ќе биде од голема помош за вашиот ’рбет.