Витамин Б

Против замор и исцрпеностЛејла Беговиќ

Нашиот организам не може сам да ги произведе витамините од Б-група, па треба да се внесуваат со исхрана и/или консумирање суплементи. Тие учествуваат во растот и развојот на клетките и преносот на нервните импулси, важен се елемент за создавање и подигннување на животната енергија, за нормална работа на имунолошкиот, срцевиот и системот за варење, како и за здравјето на ноктите, косата и кожата. Витамините од Б-група најмногу ги има во јаткастите плодови, интегралните житни растенија, црниот дроб, млекото, јајцата, месото, рибата, зеленчук со зелени листови, мешунките и бананите.

Витамин Б1: Природни извори на витамин Б1 се црниот дроб, месото, јајцата, пченичните никулци и интегралните житни растенија, грашокот, зелената салата, оревите, кикиритките и друго. Витаминот Б1 е важен за процесот на преработка на јаглехидратите, мастите и протеините, како и за работа на крвните садови и нервниот систем.

Витамин Б2: Неопходен за создавање енергија од јаглехидратите, мастите и протеините, витаминот Б2 или рибофлавин е неопходен за растот, добриот вид и процесот на дишење. Го има во млекото, месото и јајцата, јаткастите плодови, житните растенија и зелениот зеленчук.

Витамин Б3: Многу е важен за добивање енергија од глукозата, за производство на хормони и функционирање на нервниот, кардиоваскуларниот систем и системот за варење. Ниацинот или витаминот Б3 го има во квасецот, пилешкото месо, јајцата, овошјето, зеленчукот и житните растенија.

Витамин Б5: Се нарекува и пантотенска киселина и е вклучен во производството на енергија и е важен за урамнотежено ниво на холестерол во крвта. Го има во рибата, црниот дроб, зеленчукот, овошјето, месото и житните растенија.

Витамин Б6: Овој витамин кој се нарекува и пиридоксин многу е важен за имунолошкиот систем, производството на клетките на крвта, хормоните и за функционирање на мозокот. Извори на витамин Б6 се црниот дроб, мисиркиното и пилешкото месо, месото од туна, бананите, сувото грозје, компирот, спанаќот и сојата.

Витамин Б7: Биотин или витамин Б7 е неопходен за метаболизам на јаглехидратите, протеините и мастите, за процесот на преработка на аминокиселини и за раст на клетките. Го има во квасецот, црниот дроб, жолчката, печурките, кикиритките, карфиолот, морковот.

Витамн Б9: Фолна киселина, односно витамин Б9 е неопходен за синтеза на ДНК, создавање еритроцити и за работа на кардиоваскуларниот систем. Го има во зеленчукот со зелени листови, мешунките, цитрусите, пченичните никулци, интегралните житни растенија и месото.

Витамин Б12: Цијанокобаламинот или витамин Б12, исто така, учествува во синтезата на ДНК и е битен за активноста на нервниот и кардиоваскуларниот систем. Го има во намирници од животинско потекло, морските плодови и рибата.

Без оглед на тоа дали сме здрави, болни или се чувствуваме заморно и исцрпено, неопходно е секојдневно да ја внесуваме во организмот потребната количина на витамини од Б-групата преку храна или во облик на таблети Б-комплекс, кои треба да се чуваат во оригинално пакување на температура до 25 °C.