Зајакнете ги мускулите во вода

Ненад Алексиќ

Водата е одлична средина за вежбање, се препорачува за сите возрасти, од децата, реконвалесцентите до лицата од трета доба. Во море или базен, вежбањето во исто време е и масажа, а природниот отпор на водата доведува до тоа да согоруваме повеќе калории отколку кога вежбаме на суво. Можноста за повреди е речиси исклучена, бидејќи наглите движења во водата се отежнати, рамномерно работат сите мускули, а зглобовите и ʼрбетот не се оптоварени.

Одење: Во вода сме 10 пати полесни, па низ неа се движиме како да имаме тегови на нозете. Колку водата е подлабока, толку движењето е потешко и дава подобри резултати. Обујте обувки за вода или стари патики и одете низ водата покрај брегот. Прво згазнете до глуждовите, па до колената, исправете се, одржувајте ја рамнотежата со рацете, кои треба да го следат ритамот на нозете. Кога ќе се охрабрите и ќе стекнете малку кондиција, влезете во вода до половината и одете десетина минути, додека не се заморите. Одењето низ вода е благотворно за сите мускули на нозете, задникот и стомакот, бидејќи ги затегнува и обликува.

Вежби во плитак: Заземете полуседечка положба, потпрете се на лактите и надлактиците, а потоа нозете соберете ги па испружете ги, како да ја туркате водата од себе. Вежбата повторете ја 12 пати. Потоа седнете така што водата ќе ви биде до половината, потпрете се со дланките на подлогата и  подигнете ги колената колку повеќе можете кон градниот кош. Потоа седнете со исправен грб, опуштени раменици кон назад, исправени нозе, па раширете ги рацете и со рамномерни движења свиткајте ги кон стапалата, додека не ги допрете 10 пати.

Вежби во длабоко: Отпливајте малку во подлабока вода, доволно длабока  за нозете да не го допираат дното. Лебдете на грб, со раширени раце и релаксирајте го телото. Потоа затегнете го стомакот и мавтајте со стапалата, колку побрзо можете. Ова е одлична вежба за зглобовите на вашите нозе. Кога ќе се заморите, одморете неколку минути лебдејќи на грб, па „исправете“ се во водата така што ќе „стоите“ вертикално. Додека ја одржувате рамнотежата нежно кружејќи со рацете по површината на водата, правете „ножички“ со нозете, 10-20 пати. Оваа вежба ги отстранува масните наслаги и е природна антицелулитна програма. Одморете се малку, полека пливајќи, па повторно заземете вертикална положба и обидете се да „трчате“ во место, подигнувајќи ги колената кон градниот кош. Оваа вежба ги обликува мускулите на нозете, задникот и половината.

Игри со топка: Обична пластична топка која се надува или мала, лесна и гумена, се идеален реквизит за игри во вода, кои се благотворни за целото тело. Влезете во водата до половина и дофрлајте се со топката со децата или пријателите. Не се женирајте да го истегнете целото тело, и ако треба да се „фрлите“ во водата по топката. Слободните, природни движења на рацете и нозете, се идеална вежба за обликување на сите мускули. Можете да играте и одбојка, со семејството застанете во круг, така што оние кои се повисоки ќе отидат во подлабокото, а оние кое се ниски со растот (децата), ќе заземат позиција во плитакот. Игрите со топка се одлични и во подлабока вода, бидејќи комбинираат пливање (кога топката ќе ви избега) и бараат да се извиете и „исфрлите“ од водата за да ја дофатите.

Игрите со топка во вода не се добри само за здравјето туку се и многу забавни, но никако не смеете да заборавите на заштитата од сонце.