Интолеранцијата на лактоза е неможност за варење на млечниот шеќер – лактоза. Кај повеќето луѓе способноста за варење на лактозата се намалува веќе по втората година од животот.

Медот се користи во исхраната на човекот уште од времето на неолитот. Веќе во стариот Египет доаѓаме до податоци за организирано одгледување пчели, а овој многу корисен инсект бил и задолжителен дел од знаците нацртани на гробниците на фараоните. Уште тогаш медот е употребуван и за разубавување.

По прославата на својот седумдесетти роденден и одењето во пензија, Мароканецот Лехасан ес Шакири решил дека е време да го заврши средното училиште. Овој упорен човек во детството морал да го напушти школувањето поради тешката материјална ситуација, но никогаш не престанал да чита и самостојно да се образува. Во текот на животот научил француски и германски јазик, а се надева дека по завршувањето на средното училиште ќе успее да запише и студии по социологија.

Масачусетскиот институт за технологија објавил резултати од истражување според кои под површината на нашата планета лежат наоѓалишта со неколку милијарди тони дијаманти. Ова е само донекаде добра вест, со оглед на тоа што споменатите залихи се наоѓаат на длабочина од 145 до 240 километри. Моментната технолошка опременост не ни дозволува да дојдеме до ова богатство, а единствена шанса за нивно излегување на површината е вулканска ерупција од големи размери.

Оваа година се одржува 69. по ред натпреварување во рамките на Светскиот шампионат во Формула 1. Овој, по мислење на многумина, најлуд и најбрз „циркус“ во светот своето постоење го започнал далечната 1950 година. Учесниците на првата трка на Формула 1 се натпреварувале во брзина и во возачка умешност на улиците на гратчето По во францускиот дел на Баскија. Првиот победник во историјата на ова натпреварување бил Италијанецот Џузепе Фарина, а победата ја освоил во својата алфа. Овој податок и денес со гордост ќе го истакне секој сопственик на оваа марка автомобили.

Симптомите како напнатост, страв, претерана загриженост околу секојдневните проблеми, пречки во концентрацијата, згрченост на мускулите и стегање во градите укажуваат на анксиозност. Во консултација со лекар е можно некои од овие симптоми да се ублажат или целосно да се отстранат со промена на животните навики. Правилната исхрана е еден од клучните фактори во одржување на доброто здравје, така што не треба да нè чуди што на листата на намирници кои се препорачуваат во борба против анксиозноста се наоѓаат стандардните состојки на здравите диети. Јаткасти плодови, семки од тиква, риби богати со омега-3 масни киселини, јајца како извор на протеини, витамин Д и триптофан кој е прекурсор на серотонинот, би требало да бидат што почесто на трпезата. Истото важи и за куркумата, јогуртот и црното чоколадо. Умереноста е, секако, препорачлива, како и редовната физичка активност.

Трката на полжави традиционално се одржува во Велика Британија уште од 1960 година. Овогодишниот победник бил полжавот Хост кој го добил името по растението што го пронашол неговиот сопственик. На натпреварувањето се појавуваат и полжави посебно одгледувани за оваа прилика, но сè уште не успеваат да го надминат рекордот од 1995 година. Тогаш полжавот со име Арчи ја поминал стазата долга 33 сантиметри за неверојатни 2 минути и 20 секунди. Трката почнува со извикот: „Подготви се, внимание, полека!“ Победникот добива сребрена чинија полна со зелена салата.

Градските власти во Виена објавиле податок кој укажува на тоа дека коњите кои ги влечат кочиите наскоро би можеле да добијат пластични потковици. Овој старински начин на превоз е многу популарна туристичка атракција. Меѓутоа, според тврдењата на градските власти, металните потковици годишно прават штета на асфалтот во висина од 700 000 евра. Во решавање на проблемот е вклучен и ветеринарниот факултет и моментно се тестираат четири вида пластични потковици.

Простатата е жлездест, добро васкуларизиран орган, подложен на периодична физиолошка конгестија (прилив на крв во ткивото поради процес на мокрење, дефекација, коитус) и често е место на акутна и хронична инфекција. Поради својата положба е подложна на инфекции чиј почеток е во мочниот меур и мочниот канал. Градена е од жлездено и мускулно ткиво. Се наоѓа под мочниот меур, пред ректумот и го обвиткува почетниот дел од мочниот канал. Главна функција ѝ е производство на секрет кој влегува во состав на семената течност. Има големина и облик на костен, со просечна тежина од околу 20 грама.

Анатомски гледано, меѓупрешленските дискови се состојат од желатинозно јадро богато со вода и периферен фиброзен прстен кој на дискот му дава цврстина. Под дејство на разни фактори како што се: стареење, генетски предиспозиции, оптоварување, неправилно држење на телото при подигање товар, ревма, воспалителни болести, а понекогаш и без јасно дефинирани причини, доаѓа до дегенерација на дискот и пукање на јадрото и прстенот.